tag:blogger.com,1999:blog-210500492024-03-09T00:00:36.021+01:00Alex VisseringVISSERING'S VISIE (uit het radioprogramma Noordmannen, iedere zondagmorgen op Radio Noord van 8.00u tot 11.00u)Alex Visseringhttp://www.blogger.com/profile/13634407199439913887noreply@blogger.comBlogger139125tag:blogger.com,1999:blog-21050049.post-4771271348836006352008-12-07T12:30:00.000+01:002008-12-07T12:31:20.351+01:00Noordmannen/VisseringsVisie/DenemarkenMit n wollen laange onderboksem en n borstrok aan, n beremutse op en haandschounen zunder vingers aan sjok ik in de voutstappen van de perfester deur de modder in t duuster van de winternacht. Hier in Noord Oost Polen in het Biebrza reservoat binnen wie op wolven zoas dat hait.<br />Wie lopen deur n moerasachteg gebied in de zog van Cesare Weganowski, bioloog en adjunct directeur van dit 60000 hectoare groot biosferen reservoat. Inains blift hai stoan en fluustert ons tou dat op de grond woar wie lopen doezenden duutsers dood kommen binnen in de twijde wereldoorlog. De russen hebben ze in heur opmars noar t westen mit honderden tougelieks doodschoten en de strödde oafsneden. Om nog mor nait te proaten van wat hier in de Tsarentied en in de eerste wereldoorlog gebeurd is.<br />Mit: “Blonde mientje heeft een hart van prikkeldraad” in mien kop lopen we wieder. De camera bonkt mie op de rugge en Bertus en Johan, mien kammeroaden roaken in t duuster wat achterop. We moggen gain luchies op doun. Gain aftershave of aandere lokkepoemel aan de kop smeren omreden wolven roeken dat direct. Bie n verhogen in t moeras stoppen we. Professor Cesare vertelt zachies dat dit n olde artillerie stelling van de duutseres west is. Hier kinnen we mooi stoan om de wolven te bekieken. Kaans is klaain mor t is perbaarn weerd.<br />Der binnen pups groot wodden in t bossie veur ons.<br />Blonde Mientje zeurt nog aal deur mien kop as k, anderhaalf uur loater, n poar honderd meter veur mie weure zai. N Joagende vos springt as n jonge kadde achter n moeze aan en langzoamerhaand is zo t licht wodden dat we t landschop weer kinnen onderschaiden.<br />Wie kommen hier aal joaren en dit is de eerste keer dat wie der in de winter binnen.<br />Wat ons hier opvaalt in Polaskie, n pervincie in Noord Oost Polen is dat net as in de rest van t Oosten ales mit wodka gepoard gait en dat de geschiedenis nog aaltied n grode rol speult.<br />Cesare onze gids het n stoapel duutse helms, pantzerfausten, minen en aander oorlogstuug onder de trabbe in zien koamer stoan. Der wodden nog elk joar minseleke resten in t moeras vonden. Duutsers, Russen, Polen en burgers, elke hectoare in dit gebied is deurdrenkt mit bloud. Ik kom der ter plekke achter dat ik doar hailemoal nait zo vrolek van wor. De walging nemt iedere moal dat ik in Polen west bin om vogeltjes te kieken, tou.<br />Dat wie, de minsen of veur mien part de minshaid tot zulke dingen in stoat binnen stemt mien gemoud nait zunneg. Ik leuf pertinent in het verboale. Proaten. Op wat veur niveau mokt nait uut. Proaten tot je der bie dele valen. In Geert Mak zien serie op de VPRO over Europa kinnen je zain dat de wereld laiders uut dij tied de buit aal verdaild haren veurdat de oorlog veurbie was. Dat het in Warschau nog sikkom 200000 Polen t leven kost. De Duutsers konnen heur gang goan terwiel dat de russen aan de aandere kaande van de rivier stoan mit te kieken.<br />In het Fort van Osowiec hebben wie veurege weke n rondlaiden had. Mit n Russische helm op en n duutse handgrenoat in mien haand waren wie aan t maaljoagen mit onze gids.Ik heb mit mien moat 42 op dezulfde plek stoan woar Nicolaas Romanov, Tsaar Nicolaas de 2e, 30000 soldoaten tousproken het veurdat ze de dood in juig en ik bin der achter kommen dat ik baange bin. Nait zo mor baange, nee schietbenaauwd dat der vroug of loat weer zo’n idioot opstait woar wie mit zien alen achteraan huppeln. Bewoar mie veur het zingen van Blonde Mientje heeft een hart van prikkeldraad….<br />Ik kom hier aal joaren en dat blief ik ook doun. Ik waaiger in de toukomst kazematten, forten en bunkers te bezuiken. Ik bepaark mie tot het spotten van Noordse nachtegoalen, witvleugelsteerns, scharreloars, zeearenden, blauwborstjes, kroanvogels, distelvimken en neegndoders dij heur prooi op t stiekeldroad spiezen.<br />Ik kom hier per slot van rekening veur de wieshaid van de vogels…. En nait veur de krankzinneghaid van gekken dij denken dit in pacht te hebben…..Alex Visseringhttp://www.blogger.com/profile/13634407199439913887noreply@blogger.com8tag:blogger.com,1999:blog-21050049.post-76573417804873406982008-10-20T21:22:00.001+02:002008-10-20T21:22:37.437+02:00Noordmannen/VisseringsVisie/VeendamSystemen om minsen te loaten functioneren as haardwaarkende burgers wodden aal sunt joar en dag deur de intelligentsia bedocht. Deur voak charismoatische mannen wodt geschiedenis schreven en de wereld veraandert van tied tot tied deur dizze nije groothaiden. De aine bedoult het nog beter as de aander en as twij grode gaisten mit mekander verboal op de voeste goan is dat voak n aanlaiden om oorlogen te voeren en miljoenen onschuldege minsen om zaipe te helpen. Kiek noar de grootste historische gebeurtenissen van de leste 1000 joar.<br />Manluu mit over t algemain goie ideen en visie over toukomst begunnen mit veul enthousiasme en passie aan heur ideoale wereld te waarken. As ze macht roeken gait t mis. Geboren wereldlaiders verworden tot despoten dij gain tegensproak dulden en begunnen te moorden en oet te schoakeln.Wereldwied wodden sympathieke echtgenoten en voaders de grootste criminelen. Zai verstoppen zok in bunkerachtege gebaauwen, rieden in gepantserde auto’s en ontwikkeln zok as n elite dij t daglicht nait meer verdroagen kinnen. Het ego krigt sterallures en het op pepier zo mooi verzonnen systeem wodt n last veur de gewone burger. Despoten zain ales as n bedraigen en de cirkel is weer rond.<br />De golfbewegen van de tied dut zien waark. Wuiren we vrouger nog aan t kruus spiekert tegenswoordeg is n oafrekening in het criminele circuit of n terroristische aktie n mooie menaar dien tegenstaander noar de aandere kaande te helpen. De Russische Tsaren wuiren bie wanbeleid deur heur aigen lijfeigenen vermoord. Anno 2008 krigst n poar miljoen euro bonus en magst noar hoes.<br />Totalitaire regimes, t socialisme, t communisme en joa, zulfs t kapitalisme binnen nait hufterprove. Ons parlementair stelsel trilt op zien fundamenten nou Jan Peter en Wouter bankiers wodden binnen. Speculanten en effectenhandeloars goan terecht op de bek en ook nog janken as ze n snee in t oor hebben. De structuur van onze soamenleven wodt reset deur X of deur Y, doar bin ik nog nait achter mor dat het beroven van gewone burgers deur banken en overhaiden nou oaflopen is, dat mag dudelk wezen.<br />Veurege weke, tiedens het inmekoar störten van de wereldeconomie en het omvoalen van de banken zat ik in Oost Duutslaand. Op Rügen, bie de kroanvogels en de kräutermatjes.<br />Tillevisie kiek ik nait in de vekanzie en aalgedureg ik dee de radio aan veur t weer. Programmoa’s wuiren onderbroken as kanselier Angela Merkel n moatregel bekend muik.<br />Beursen over de haile wereld störten in en ik had de aine culinaire hoogtepunt noa de aandere. N Zeearend, n volwassen daar mit n widde steert juig n poar doezend kroanvogels de lucht in en mien fotoapperoat muik overuren. De zunne haar dudelk gain last van n depressie.<br />De rokerijtjes op de koade van t vissershoaventje in Sassnitz verkochten heur vrizze vis aan t hongerege volk en de omega 3 index steeg noar grode hoogten. Aan de horizon van de Oostzee knapde n grode luchtbelle mit honderden miljarden dollars, euro’s en aandailen oet mekoar.<br />Gainaine zag t gelukkeg. Mien totalitair navigoatie systeem brocht ons feilloos noar de Varbelvitzer Bodden woar wie op de houke van Ummanz Zanderfilet en Vis Soljanka, aten. De wereld rond om ons tou zakte nog daiper in n schietbulde.<br />Ons aigen ekonomietje draaide op volle toeren en t geluk laachde ons tou. T Wichtje kreeg n bonus van €2,20.<br />N Goud gevuil, n Muskusröttenvaanger gait nooit dood van de honger….Alex Visseringhttp://www.blogger.com/profile/13634407199439913887noreply@blogger.com1tag:blogger.com,1999:blog-21050049.post-72823605673911111062008-10-13T09:23:00.001+02:002008-10-13T09:24:26.772+02:00Noordmannen/VisseringsVisie/t ZandtMit in mien achterheufd t deuntje van de zilvervloot en gedachten aan vervlogen tieden dou ik nog n olderwets spoarbankboukje haar stoa ik in t Verbindingsknoal tuzzen Veelerveen en t Rhederveld. De liesleerzen lopen sikkom over en n iesvogeltje vlaigt op mie tou en schrikt zok de pleures as hai mie in t wotter stoan zugt. De foeke dij ik as Muskusröttenvaanger der Provincie Grunnen controleer is gelukkeg leeg en ik kroep mit n poar katachtege bewegens de wale weer op. Geld het mie aaltied al interesseerd. Ik dreumde n moal da k riek was en da k ales kopen kon wa k wol. In dijzulfde dreum kreeg de haile wereld n verschrikkeleke pest aan mie omreden k was mit aal mien sinten de grootste kniezebieter van Stad en Loug.<br />Mien kasteel op Westerwolde en mien Epson gruine Range Rover waren gain garantie veur levensgeluk en mit elke dag n aander consumptieve bevredeging, veul dure gitaren, golden kettens, speedboten en zulfs n boswachtertjegruine stropdaze wuir k aal ongelukkeger en begon te verlangen noar beroup in de vrije netuur.<br />Dou schrok ik wakker en haar kopzere. De piene in de kop was zo filaain da k 2 aspirientjes deurslook en stiekom op de bankoafschrift in t burootje keek of dizze dreum bedrog was. Joa dus.<br />In de tied van de betoalcheque vuilde ik aal naddeghaid. K Zörgde da k sinten in de buutse haar en mien wantrouwen tegen dat nijmoodse pepieren gedou wuir mie nait in daank oafnomen.<br />Bist conservatief, most mit de tied mitgoan en ik herinner mie ooit n achterbakse winkelbedainde dij mie, woarschienlek deur mien uterlek nait vertraauwde en het pasje mit t banknummer en mien handtaiken wel drij keer controleerde, noar zien boas ging en loater vruig of dat mien echte noam was en as dat zo was, of ik aine van Jan de Spreker of Jan de Zwieger was, dij gloeperd.<br />Mien verleden mit de cheque en loater de euro check is der aine van hoat en laifde. Tiedens de euliecrisis in de 70 joaren heb ik dizze ellende al veurspeld en ruip doudestieds:’ Wacht mor, t wodt nog veul aarger, der komt n tied dat diesel n doalder kost’!<br />Nou, anno 2008 stoa ik in t centrum van Troapel in de openlucht te pinnen. Het woord alleneg al. Pinnen. In opperste concentroatie perbaar ik mit de zunne in de rugge t beeldschaarm te ontciefern terwiel n veurbieganger aan mie vroagd: ‘Wissen sie wo hier die C 1000 ist?’<br />Schrokken deur dizze onverwachte vroag en mit mien aangeboren onhandeghaid sloekt de mure mien pinpas deur en ik stoa veur lul op stroade. T Schient dat noa de 3e moal de boudel op tilt goat.<br />Zo stoan de zoaken der veur. In Noorwegen en Frankriek kin k nog gain dubbeltje opnemen omdat dij verrekte credietkoarde veur zokzulf begunt. Mit de rest van t plestieken kaptoal most n haile stad deur om aan n poar loezege sinten te kommen en volgens de A.L.E.X. index wodden wie verneukt deur Banken en de heren dij mit veul crimineel egards dizze boevenclups regeren. Zo ist en nait aans!<br />Ik mot der de pot van op.Bie mie thoes vaalt de boudel nait om,nee ik dou aan reintegroatie.<br />Der hangt bie mie boven berre n wubkoarntjeblaauwe hoesholdsokke, n kanariegele vekanziesokke, n geitewollen noorse sokke mit n gat in de tone veur as de wasmesine kapot goat en n swaade sokke woar netuurlek niks inzit….<br />Zoas ik aal zee: ‘Geld het mie aaltied al interesseerd’.Alex Visseringhttp://www.blogger.com/profile/13634407199439913887noreply@blogger.com0tag:blogger.com,1999:blog-21050049.post-32903662271814522332008-09-28T12:29:00.000+02:002008-09-28T12:30:08.046+02:00Noordmannen/VisseringsVisie/EeldeT Is mien tied . Ik mout goan. Dat denk ik sikkom elke mörn noa t lezen van de kraande en n tasse thee. In de haarfst is dit gevuil nog staarker. De drang om vot te goan begunt aal bie t opstoan. In mien PC Hoofdtrekker begeef ik mie den noar mien jungle. Op zuik noar wilde daren, snelstromende rivieren, wottervalen en mit n, in de loop van de joaren ontwikkelt zintuug om zo waineg meugelek volk tegen te kommen.<br />Eerst mor ais op de Hoofdkoade links oaf, eem rechts en den direct weer links over de Olle Weg mit zien mooie rooie beuken, veur de RSG langs, links oaf de Sellinger stroade op.<br />Zit e der nog? Of ist torenvaalkje op jacht. Hai s vot. Zo, rechts oaf richting Selgn.<br />N Wandeloar op t fietspad, snelheidscontrole op Ter Hoar. Eikels! N Viskerman aan de Oa.<br /> mit n duuts kentaiken, t zol wel n streuper wezen.<br />K Druk de radio uut. T Gezeur van de presentator en de steurende geluden van mien gebroken antenne irriteren.<br />In de verte zai k de maishakseloars en trekkers mit koaren rieden, en t is oostenwind, dus de kaans op kroanvogels in mien jungle nemen tou. Opletten dus! De zunne schient jeugdeg vandoage. Nait zo van bats, klap hom der mor op, mor op n vrundelek nedde, fesounleke menaar wodden we deur heur beschenen. T is geliek as oaf zai ook bliede mit de haarfst is.<br />Op Ter Wisch binnen ze aaltied drok. Doar wodt waarkt , noadocht, componeerd en genoten van de wereld woar dizze minsen in leven. Mit uutzicht op n drijdimensionoale mit zunnestroalen overgoten landschop is Ter Wisch aaltied ain van de mooiste steden in mien jungle.<br />Links Ter Walsloage, rechts Floor, Laude, melkfebriek, broene koien op Ter Börg.<br />De aiken vol mit ekkels binnen dit joar wel aarg mooi. Verbeel ik mie dat of is de haile boudel langer gruiner? O nee, t rood en geel zai k bie het noadern van Selgn de hoofdstad van mien jungle. Gain winkelcentrum mit allemoal gelieke veurkanten. N Dörp mit bloudaigen kerakter , n antiekwinkel en n prachtege widde wolke mit schaarbe raandjes boven zok.<br />n Vlucht kieviten vlaigen vanuut t blaauwe zo t widde binnen. Eem veurbie Selgn stait de mooiste ekkelboom van de haile wereld aan t daipie. N Dikke stam mit n geweldege kuuf het mie de leste joaren verlaid dizze joekel in alle seizoenen op foto te zetten. Elke moal as ik der veurbie rie groet ik hom mit respect. “Moi boom”, zeg ik den, ‘Wat bist weer mooi vandoage”<br />En den aal dij appelbomen in mien jungle. Dit is t beste appeljoar sunt joaren. De appelmoes productie, haide bliksem consumptie en gewoon n appeltje snacken nemen in dizze haarfst mit 720 % tou. Dat is nog ais nijs! ‘One Apple a day keeps the doctor away’ is de uutsproak van n bekinde Grunneger dij zien noam mie eem ontschoten is, mor zo is t wel. Steufperen binnen der nait zo veul omreden dij hebben in t veujoar vorst op de kop had. Jammer. Bie Jipsinghoezen goa k rechtsoaf mien jungle in. Parallel aan de Roeten Oa boan ik mie n weg deur de wildernis . Wolgnhoezen, gruine trekkers aan t eerdappelruden, drij speulende buizerds boven t laand, n mooie vole bie n Welshpony en rust op mien weg wied vot van rotondes, stoplichten en files. De ainegste files woar ik mit te moaken heb binnen de rollators van de VUT duutsers in Bourtange en de fietsende oudere medemensch op t betonpadje in t Rhederveld. Dit wil ik groag zo hollen. Dwing mie nait tot n ainziedege guerrilla burgeroorlog om mien jungle te verploatsen noar hier of doar mor loat dizze older woddende bestrieder van t kwoad in zien weerde en in zien omgeven. Het is te loat om dizze gaist te resetten, om te boegen of bie te spiekern. Het is net of deur t verlais van honderden miljarden dollars en euro’s de wereld wat lichter draait, de zunne wat stiever schient en ik mien gram hol….Alex Visseringhttp://www.blogger.com/profile/13634407199439913887noreply@blogger.com0tag:blogger.com,1999:blog-21050049.post-75841132061423963102008-09-21T13:46:00.000+02:002008-09-21T13:47:27.712+02:00Noordmannen/VisseringsVisie/KielwindeweerOp mien streuptochten deur Westerwolde en de rest van t Grunneger laand bin ik regelmoateg slachtoffer van geurterreur. Meurende onderwaarpen kommen op mien weg noar de horizon en doun de neusvleugels rekken en strekken.<br />Muskusrötten in verregoande stoat van ontknoping, Eendenusten verstopt tuzzen t rait mor mit n odeur om op de loop te goan beheuren tot de slimste problemen in mien doagelieks bestoan in het veld.<br />Vossen kinnen der ook wat van. N Vrizze vossehole roekst vanoaf 10 meter oafstand. N Schaarbe gore geur wodt voak begelaaid deur oafgereten ledemoaten van knienen, hounder of aander klain spul. N Zwien op zok is n prachteg intelligent daar mit klaine pretogies en n rond rose lichoam. Mit n haile schure vol wodt aal aans en as der doezenden op ain bulde zitten komt t toch in de buurt van overlast. Veuraal jirre van zwienen is gain pretje en de acetonlucht dij doar oaf komt is n ploage veur de minshaid. Dit geldt ook veur koie en tudemisse. En wat te denken van peerden. Peerden binnen schiere baisten, op n oafstand, mor stinken de moat. Ze kinnen wel vouten hebben, intelligent wezen, de gemiddelde klaphengst roekst.<br />Avebe kon der vrouger ook wat van. Wie woonden aan t knoal en as de eerdappelcampagne begon kost mit goud fesoun nait bie t wotter stoan. As n soort Iers Guinness bier mit broene schoem op t wotter wuir ons wies moakt dat de economie in de Veenkolonies hoogtij vierde. Op de voelwottergoaten en vloeivelden bezonk t röttend aaiwit en wie vonden t goud. T Heurde derbie. Wie wozzen nait beter.<br />Verantwoordelek veur roekjederij is t reukslijmvlies boven in de neuse. T Moakt nait oet ofst n klain wupneusie of n dikke gokkerd hest. Elk levendeg wezen het n snötkoker. Bie mie is de neuse aigenlieks echt ontwikkeld dou k ik n joar of achte leden stopt bin mit roken. Der ging n wereld veur mie open. T Eetn smuik veul lekkerder, en de reuk nam tou. Ik vuil as t woare mit de neuse in de botter.<br />Noast de geurterreur in het doageliekse leven binnen der netuurlek ook genog dingen dij lekker roeken. T Grootste veurbeeld binnen veur mie de zuide appeltjes van de langezuitenboom bie mie oet toene. Ik bruuk ze in de vangkooien. As t bie mie in auto stapst wost overvoerd mit n weeë zuide lucht van haarst, geluk en haide bliksem. T Bringt die in de juuste stemming om op pad te goan en te genieten van rudende boeren en fietsende vutters. Mit n wottereg noajoarszunnegie op de kop en lange krusende strepen in de lucht roekst de haarfst. De zweem van heu op t laand en eerdappels net oet de grond trokken is der aine van tevredenhaid en ’t is mie aal wel goud’ ondanks n wereldcrisis en aandere flaawekul.<br />De geur van camille in de margraitjes, n vlije op tonge van de springbalsemien is t kabbelende bootje van mien bestoan in t noorden van n klain laandje, mit mooie minsen.<br />Roekie en Stinkie mien favoriete muskusrötjes onderwegens noar heur vreetplekkie onder de Brugge in t Rhederveld, n Stainmarter mit n prooi in zien bek, n Levendeg zwoanepoar mit 3 jongen, n visoarend op de totempoale bie t Bourtangerknoal, n Dodaarsje dij wegduukt in t Verbindingsknoal tuzzen Veelerveen en de Boeskoolweg. Ik stoa overaal mit mien neuse veurop.<br />De geurterreur dij dizze oafgelopen weke ales overtrof kwam oet t westen, oet Den Hoag.<br />Sums mouten je aan zogenoamde zaachte heelmeesters gain aandacht besteden.Alex Visseringhttp://www.blogger.com/profile/13634407199439913887noreply@blogger.com0tag:blogger.com,1999:blog-21050049.post-51412363429374434682008-09-14T14:49:00.000+02:002008-09-14T14:50:23.868+02:00Noordmannen/VisseringsVisie/KropswoldeT Speulgoudje woar ik t wiest mit was, was n Morris Minortje in n soort boswachtertje gruine kleur mit holten panlatjederij aan de ziedkaanten. Ze muiken in Engeland auto’s van blik en holten ziedstrepen in de zesteger joaren. K Kon der uren mit speulen en de kokosmatten bie ons in de gange waren mien autoweg. N Olle schounendeuze was mien garage. Dou k wat older wuir kwamen de bongeljoaren en netuurlek dee de tillevisie zien intrede.<br />Pipo de Clown en Mamaloe en Swiebertje waren onze favorieten en Tante Rieke n poar huzen wieder was onze huus- bioscoop.<br />Ale kinder uut de buurt zaten bie Tante Rieke tilleviesie te kieken. Zai traktaarde de haile boudel aaltied op waarme ijsco’s van n dubbeltje en was stoapelgek mit ons.<br />Snuf en Snuitje waren de boeven en Malle Pietje de komiek van dij tied. Dou kwam Bonanza en Gunsmoke. Stoere cowboys reden mit n gloepense gang over de prairie, de meziek ging net zo haard ast t hoefgetrappel van de prachtege peerden. Echte kiddels schoten heur pistolen en geweren leeg in de lucht en ik docht, dit wil ik ook.<br />Op Sinterkloas 1964 kreeg ik ain repeteergeweer mit knappertjes en n peau de suède reebroen jassie mit franje aan de maauwen. N Beetje aan de grode kaande, mor ach, wel zag dat. In mien gedachten reed ik op mien Little Joe peertje over de zaandpoaden van de Veenkolonies en ik vuilde mie den ook n pionier, dij op t kerkhof van de Hervormde kerke in Muzzelknoal achter bisons aanzat en indioanen doodschoot. Woare slachtvelden speulden zok oaf tuzzen de groaven van: Hier rust mijn lieve man en vader en ‘De Here heeft tot zich genomen….”<br />De beuken hege rond t kerkhof was de grens tuzzen Texas en Mexico. T Duurde mor eem en wie haren bie ons in de volieres ons aigen cowboydörp. T Leutje hounderhok was the jail en t vak woar wie s winters de wildzang in huilen was de saloon, de bank en de bakkerij.<br />Dollars schreven wie zulf deur de schriffies van school te verknippen in repen en doar mit de viltstift van mien pa de bedroagen in te vullen. Ik was ook metain de riekste cowboy van de haile buurt.<br />De wasliene poale in toene was de galg en elke gringo mit n verleden of n slecht gewaiten wuir hier ophongen. Wie speulden elke weke n oaflevering van de series noa en t kwam regelmoateg veur dat Bonanza opging in Gunsmoke en aandersom. Henkie Smit zong aaltied: tandanderandanderandanderan Bonaaanxzaaaa en Werner Hebels haar de mooiste houd. N mooie tied was dat. Wie waren jong en ongeschonden, de Beatles vonden de popmeziek uut en ik baauwde mien eertse gitaar van n sinasappelkissie, n n vuren latje en verrouste gebruukte snoaren van ons Jaap zien banjo. As in dij tied de tillefoon ging stonden wie allemoal bie voader te kieken en roadden stiekom wel of hai der veur haar. De snelkookpane van ons moe stond aaltied te sissen. 7 jonges en 2 ollen waren wel eem 9 man woar voedsel aan verstrekt mos wodden. De aine lusde gain stampot ‘haide bliksem’ en d aander haar de pest aan macaroni terwiel ons Johnny bie de aanblik van n doodnormoale siepel aal op de rekken ging. Pa zien joa was joa en nee was nee. Ze luiten ons mit ales geworden en grepen in as dat neudeg was.<br />Mien moe was supernanny, jeugdwaarker, orthopedagoog, chauffeur van de band en reloatie therapeute in ain. As ik nou in september 2008 : “Nee knul das nou een navigatiesysteem” op de radiorecloame heur, wait ik dat der veul mis is.Alex Visseringhttp://www.blogger.com/profile/13634407199439913887noreply@blogger.com0tag:blogger.com,1999:blog-21050049.post-12232231503918604272008-09-08T11:44:00.001+02:002008-09-08T11:44:59.530+02:00Noordmannen/VisseringsVisie/OpendeMien 1e literaire ervoaren was op de legere school. Ain verhoal oet de biebel over n leutje kiddeltje dij in n viegeboom klom omreden hai wol Jezus zain. T Was gain kebouter mor n Godvrezend mannechie: Aldus juffrouw de Niet n kenau van n wief mit hoar op de koezen en n nuvere board en snorre.<br />Ondanks heur stoense oetkiek en jampotgloazen in de bakelieten stainkoolswaade brille kon het serpent mooi veurlezen. De boukjes van An en Jan op de boerderij en de prachtege ploaten van Jetzes aan de mure van de Hervormde School in Muzzelknoal gaven mie op de ain of aandere menaar n goie boases. Ik ruik interesseerd in bouken en mooie verhoalen en kon menutenlaank wegdreumen in de oaventuren van de hoofdrolspeulers. Bouken over de twijde wereldoorlog vond k t mooiste. Engelandvoarders, loater Oorlogswinter van Jan Terlouw, ik was gek op geschiedenis en leefde den ook hailemoal mit.<br />Op de middelboare school mos wie bouken lezen en verschoof de interesse meer noar meziek en wichter. Ook in dij volgorde. ’ Terug naar Oegstgeest’ van Jan Wolkers las ik as uuttreksel mor ‘Animal Farm” van Georg Orwell ging der in as zuide kouke en doarnoast las ik ales van Asterix en Obelix, nou literatuur vrouger kinderboukjederij.<br />Historische bouken over de Tsaren in Rusland, de zinloze oorlogen in de veurege aiw en de woanzin van de minshaid leren mie om t leven te relativeren tot n prettig soamenwezen mit mekoar, net zo laank tot ons de koezen nait meer jeuken.<br />Denk nou nait dat ik n belezen persoon bin want dat bin ik nait. Ik lees allineg mor as ik op vekanzie bin. Vaar, vief, sums wel 6 bouken verslind ik tiedens de raaizen noar Frankriek.<br />Onder n plataan, op blode pokkel aan de raande van n zwembad op t laandgoud “Rochecondrie” heb ik dit joar de Sneeuwvalk in anderhaalf dag oetlezen. Tuzzen t zwemmen en t eetn deur zat ik in dit prachtege verhoal en kon nait wachten om t stevege bouk mit de haarde kaft weer ter haand te nemen om t spannende verhoal tot mie te nemen en te fantaseren hou de minsen en de hoezen der oet zagen. S’oavends lag ik in mien loie stoule veur de camper mit n mienwaarkerslaampie op de kop Bono zien biografie te lezen en Ararat van Frank Westerman ging veur de 2e moal veur de bijl.<br />T Gevuil van rust in de bovenkoamer te hebben, t geduld op te brengen om regel veur regel in dien harssens op te zoegen is lekker. Veur mie t ideoale vekanzie gevuil. Gain gestres of gekloot en gezeur over waark ,mor n rustpunt in n drok joar. N Rustpunt mit as doageliekse hoogtepunten: De supergezonde Rooie wien oet t Rhone dal en de sikkekezies op n stukkie baquette. De krummels valen op de letters van Hoodfstuk 7 en mit n nadde vinger perbaarst de ressies der of te kriegen. Das geluk. Gain wieshaid.<br />‘Ik bid niet veur brune bonen’ en ’Zij trokken op naar Jericho en kregen zoveel zakgeld ze maar wilden’ binnen de ainlieners oet de bouken van Anne de Vries dij zoveul indruk om mie moakt hebben, dat ik ook mit n wichie en n sikke over n badnje mien gelok zuiken wol.<br />De sikke was n besteleend en t badntje de Iezern Klabbe op Muzzelknoal. T Geluk lag aargs tuzzen Troapel en de Beetse.<br />Bouken doun joen gaist prikkeln en slingern beelden noar de wiedste oethouken van mien kop. Schrievers binnen de architecten van de werkelekhaid en verzinsels en hebben de macht nije werelden te creëren woar elk individu zien aigen beelden bie het.<br />Das geluk.<br />Ik mis hom nog elke dag….<br />Kees VisscherAlex Visseringhttp://www.blogger.com/profile/13634407199439913887noreply@blogger.com0tag:blogger.com,1999:blog-21050049.post-88821581823935258532008-08-31T11:41:00.001+02:002008-08-31T11:41:42.528+02:00Noordmannen/VisseringsVisie/Ter ApelHet leven in de middelaiwen sprekt mie op de ain of aandere menaar wel aan. Luu binnen mit primaire dingen zoas eetn en drinken bezig en de luxe woarin wie ons as verwende nijmoodse minshaid bezeghôllen haar t volk van 1531 totoal nog gain wait van. Klaid in zeehondenbont en vellen van allerhande baisten gingen kiddels op jacht en vraauwluu muiken t eetn kloar, neem ik aan. Biegeleuf en hekserij wazzen gewoon en as t nait om liek wost wuirst varendaild of gewoon verbraand. Veur doemdenkerij, roddel en achterklap en aander gesnak haar t volkje van joagers, boeren en passanten gain tied. Der mos eetn op toafel kommen, speerpunten veur de pieleenboge moakt wodden en holt veur t vuur mos der kommen. Veul holt omreden t wuir n kolle nacht. De goden moggen nait kwoad wodden , doarum offerden de stam ook nog n stuk of vief Zuud Grunneger Leghorns aan Thor en Wodan, Waren ze rusteg. Chagarijnen. Aaltied gezeur mit dij godjederij. T Klooster haar boudel goud onder controle en ast mor de schien haar van ongeleufeghaid of zeest n vies woord was de toorn van ons Laimeneer nait te overzain en spraken de monniken schaande over die en dat wost ja nait. Gain gedonder in de gloazen.<br />Troubadours en raaizegers brachten t nijs van dörp noar dörp en de bards bezongen de schoonhaid van de wichter en de gevuileghaiden van dij tied. Slaauwe verkopers en aander raisvolk verkochten proatjes en lokkepoemel. Ze bedrogen de minsen woar ze biestonden.<br />Zaalfies en goar stinkende wottertjes wuiren as waarme broodjes verkocht. As t schurft, syfilis of aandere jeukerij haarst streekst t spultje op t zere stee, namst n poar liter bier tot die en bleefst n dag in t heu liggen in oafwachten van n wonder dij zok voak n poar uur loater aandainde as de man mit de hoamer, kopzere dus. T Leven was best goud. Vlaigen kon nog nait en van thoeszörge haren ze nog nooit heurd. Neukjederij, pardon, t deurgeven van de genen bepaarkte zok tot wat onhandeg gefriemel onder n schoapewollen deken in t duuster van de nacht. Woarschienlek het de pastoor of de monnik van dainst hier zulf ook oaf en tou n dankboare rol in vervult.<br />De maiste luu stonden der versteld van as der noa n moand of negen weer n potje geboren wuir. Gain babycare onzin of rose en blaauwe geneuzel, nee, Gerbrand of Brunhilde kwam aan tidde te liggen en de netuur dee wieder zien waark zoas de netuur dat honderddoezenden, ik zeg miljounen joaren aal dee. Ast geluk haarst wuir t kind groot en mit pech ging e dood en was der n joar loater de herkansing. Gain gedou wieder. Aandailen, Obligoaties en hydraterende crème mos nog oetvonden worden. Criminelen en graaiers haren gain stropdazen veur mor waren eerliekse boeven mit n gore rötkop en n littaiken op de waange. Zai lagen in roegte en stroeken en sluigen die op de kop zoas dat in dij tied heurde. Eerlieks en oprecht. Roezie wuir mit oorlogen man tegen man oetvochten en as zai de pest op die in haren wuirst ophongen. Maarten Luther was in dizze tied drok dounde de boudel te reformeren. As hai der vandoage achterkwam dat de paus n Duutser was en ‘Bedaankt veur die Blumen oit Nederland ‘zee, en de biebel in t Grunnegers vertoalt is draaide hai zok nou in zien graf om. Visionairs oet dij tied konden nait veurzain dat n leutje 500 joar loater t leven n grode wedstried wodden zel. Bedörven deur aarmzoalege tillevisie programmoa’s en zaike gaisten wodt de homo sapiens anno 2008 bedraigd deur reality shows en voetbal analisten. Olders roaken in paniek as de juf n dag schooltjezaik is. De dattegers mit kleuters en peuters verneuken de belasting mit kinderopvang en kilometers terwiel dat de vutters en aandere bejoarden in Nederland blieven omdat de diesel zo duur is.<br />In 1531 luipen ze tenminste nog. Swaade kraaien haren dou nog status en de keurslager was, zulf mit n speer t veld in om n everzwien te scoren. Der was wel ain noadail in dij tied…..<br />Der waren gain mobiele tillefoons……Alex Visseringhttp://www.blogger.com/profile/13634407199439913887noreply@blogger.com0tag:blogger.com,1999:blog-21050049.post-16950259454081260972008-08-25T11:35:00.001+02:002008-08-25T11:36:50.543+02:00Noordmannen/VisseringsVisie/ OldekerkNyons ligt op de grìns van t Rhonedal en de Provence in Zuud Frankriek. Wie binnen nou n weke onderwegens en roaken nait oetkeken. De catacomben van de camper vullen zok langzoamerhaand mit streekproducten variërend van rooie en widde wien, lavendel eullie tot en mit stinkende sikkekeze en lokoale knoflookworst. t Stadje woar wie nou binnen is t centrum van de Franse olieven.<br />Oliefeulie oet Nyons is wereldberoemd en ales in dit op de rotsen gebaauwde stadje stati in het taiken van olieven. Ik kiek vanachter mien laptop noar de mooiste oliefbomen en luu hebben hier noast veul bloumen en palmbomen, oliefbomen in toene. Kommende dunderdag is hier de dag van de olieven. Mörn rieden we richting Privas over Montemillar. Nogat komt doar vot. Elk stee, elk gedailte van dit grode laand het zien bekoring. n. Franssoos huift nooit noar n vrumd laand omreden zai hebben ales zulf. Zee, baargen, bossen, cultuurhistorie en n grode passie veur eetn en drinken.<br />Meloenen smoaken hier noar meloenen en perziken zoegst zo sikkom mit pidde en aal noar binnen. De zunne dut zien waark hier goud.<br />Tuzzen twoalf en twije trekken ze de stekkers der oet en in de noamiddag komt de boudel weer op gang. De Nederlandse tourist is n grode en dakboare bron van inkomsten en zo heb ik mie ook loaten verlaiden tot de aankoop van n flezze biologische oliefeulie van € 21,80 en nog n flezze van bienoa € 18,00.<br />Oliefbomen binnen duur. In Nederland heb ik op internet aal eem rondkeken en n echte olle boom kost n poar doezend euro’s. Is mie te duur. In mien gedachten zai ik de eerste oliefbomen-plantage van Nederland ontstoan. In de Sellingerbeetse wel te verstoan. n Bundertje of vare prachtege boompies op aarme grond. n Poar boeren pakken t op en Westerwolde het wat nijs onder de zunne. Oliefeulie en tapenoade oet de Beetse. t Zol wel bie dagdreumen blieven.<br /> t Is netuurlek zo, dat hier ter plekke ales lekkerder liekt en lekkerder smoakt. n Vissie in Termunterziel smoakt 10 keer zo mooi as n zolte hering oet de bossen ven Exloo, zo is dat ain keer. De lucht in de koelkaaste van mien camper is in Nederland n woar milieudelict terwiel der allenneg mor wat Franse sikkekezies in liggen. Dat de boudel nog nait ontploft is mag n wonder haiten.<br />Tröts is denk ik het juuste woord woar ik noar zuik. Luu binnen hier in Frankriek wies mit heur boeren en producteurs dij t eten moaken en verbaauwen. Kinnen wie nog wat van leren. Het goddeleke stokbrood, het jentege baquetje of de ‘one and only’croissant, t heurt in La France bie t doageliekse leven. Het is in Frankriek wettelek verplicht dat in elk dörp n waarme bakker mot zitten, ik bedoul mor.<br />Der is veul om over noa te denken in de vakanzie. Veul te bekieken. Minsen te bekieken, observeren. Prachtege maarkies mit de lokale bewoners en vakanziegangers. Mor ook maarkies mit n hoog vakanziekaraokegehalte en zulfbedochte nepfolklore. Mooi om te zain. Ik kin aan de raande van zo’n spektoakel aaltied moateloos genieten van verschaidenhaid van ons minsen. En wat mie in t zunnege Zuud Frankriek en in de gruine baargen van de Jura nog het maiste opvaalt? Juust......! Roare jonges dij Nederlanders.Alex Visseringhttp://www.blogger.com/profile/13634407199439913887noreply@blogger.com0tag:blogger.com,1999:blog-21050049.post-5089745530663031192008-07-12T10:53:00.001+02:002008-07-12T11:03:04.785+02:00Noordmannen in de zummerVekanzietied.<br />De haile moand juli en twij weke in augustus gain column omreden de Noordmannen binnen mit vekanzie.<br />De oetzendens zundagmörns op RTVNoord goan wel deur!<br />Wie hebben in mien zwaithut bie de golfboane in Vlagtwedde 6 prachtege programmoas opnomen.<br />3 augustus en 31 augustus binnen Okkie en ik weer laif bie joe. Tot den en n goie zummer.Alex Visseringhttp://www.blogger.com/profile/13634407199439913887noreply@blogger.com0tag:blogger.com,1999:blog-21050049.post-40528522332585312812008-06-15T12:56:00.000+02:002008-06-15T12:57:15.626+02:00Noordmannen/VisseringsVisie/EemshavenVrouger kwamen de kinder op zundagmörn sikkom veur dag en dauw bie mie op berre. Mit n kleurriek ingepakt aigen gemokt kedootje was dat n feest.<br />Verrekiekers van WC rollen, geprikte opgeplakte kunstwaarkies, de kleuterjuffen haren de leutje beudels weer tot grode doaden waiten aan te zetten.<br />Noa het officiële gedailte kwam de joarliekse ‘ontbijt op berre’ scène.<br />Mit veul gehannes en geklaai wuiren der wat broodjes en netuurlek beschuten noar binnen waarkt en het duurde mor eem en de krummels en de thee vlogen in t ronde.<br />De joaren noa het peuter en t kleuter gebeuren wuir invult mit cassettebaandjes en sokken en sunt joar en dag is voaderdag n nationoal kookdag wodden. Nou ja, poging tot koken. Voaderdag hait nait veur niks voaderdag.<br />Op dizze zundag gebeurt der wat mit de hormonen en mit de mentoale stoat van de gemiddelde man. Zien vraauweleke kaande komt veur de dag en zien territoarium drang wodt deur de aanwezeghaid van de barbecue tot grode hoogte stimuleerd.<br />Mannen, kiddels van Jan de Wit dij nog gain wotter kinnen koken ontplooien zok op voaderdag tot topkoks en dulden gainaine in de buurt van de vris aanlegde outdoorkitchen. Der binnen der gounent bie dij heur domein mit roodwit lint oafzetten en geklaid in schort mit oranje koksmutse perbaarn zai de wereld om heur tou versteld te loaten staon van de plotselinge kookkunst en de doarbie pasende meneuvels.<br />De Gordon Ramsey’s van Westerwolle, Herman de Blijkers van t Hoogelaand en de Jamie Olivers van Stad en Loug stoan mit voaderdag aan de top van de voedelketen zoas n hoaneschrobber in de locht en n zeearend in de vlucht.<br />Ze binnen op jacht west. As grode joagers oet de middelaiwen binnen ze noa weken veurberaiden der in sloagt om de prooi in te brengen.<br />Bie de ploatseleke slagter hebben ze n weeldereg grilschuddel bestelt terwiel de vraauwe bie n aander duutsachtege supermaarkt de leste T bones oet t schap trokken het.<br />Het grilfeest der voaders kin begunnen. Boven Nederlaand en Grunnen nemt de bewolking tou en het duurt mor eem en de eerste ainlieners vlaigen as rooksignoalen deur de lucht. ‘Moster ook mosterd op” en Wostoe mie de mayonaise en ketchup wel eem aanlangen?’, stoan in de top viefe en menneg indioane zol der jeloers op wodden.<br />Haalf verbraande broadworsten wodden massoal noar binnen propt en de in bouillon veurgekookte kibbepoten en vleugels wodden mit de neudege huzarensloatjes en bbq sausies votspoult mit biertjes, licht mouserende wientjes en felgekleurde nijmoodse draankies oet dizze tied. Als woare stamhoofden kieken voaders tevreden noar heur gepeupel dij zok in tien menuten te barsten vreetn en zoepen.<br />En de speklappen mouten nog…..<br />De mouder aller voaderdagraaiwe is de skuttelbraai. n Rond ding mit n gaspot der onder. Hai klopt, hai veegt en hai zoegt zok mor zeggen…..<br />De skuttelpruttel het t holtkool en t olderwets vuurtje verdrongen.<br />De pieleboge en de vuurbuks is tegenwoordeg de keurslagter en voaders binnen volgzoame types mit n laptop dij zunder tegen te spreken t vlais snieden, mouder de vraauwe volgen in meubelboulevard en op t waark en thoes niks te vertellen hebben.<br />n Man is van hoes oet n dikke joager, n roege gokker en n hartstochtelek pyromaan.<br />Gun paps ain keer per joar zien aigen brandje.<br />Gooi de speklappen der nou mor op…..Alex Visseringhttp://www.blogger.com/profile/13634407199439913887noreply@blogger.com0tag:blogger.com,1999:blog-21050049.post-92156528207412998512008-06-08T12:26:00.001+02:002008-06-08T12:26:53.339+02:00Noordmannen/VisseringsVisie/WesterbroekStel joe veur. De proef mit t nait vangen van muskusrötten goat deur, of ‘de partij voor de dieren’ krigt zoveul zetels dat het vangen van bisamrötten verboden wodt en dizze prachtege baisten kinnen heur gang goan. Wat zol der den mit Bourtange gebeuren? Sunt joar en dag waiten wie dat Boertang n old vestingdörp is mit n beruchte geschiedenis. Noa n opknapbeurt en wat oppimpjederij is t ain toeristische trekplaister van groot formoat veur onze pervincie en wied doarboeten.<br />Op dreuge nait, te haite doagen is dit dörpie aan de grup van t mooie Westerwolle ain oaose veur de heufdzoakeleke Duutse vutters. Rentners zoas dat zo mooi hait.<br />Mit und ohne rolatoren stoitern unze Deutche freunde over de kinderkoppies de vesting binnen, verovern ab sofort de baide horecatinten en hôllen de mitwaarkers van de gastfreundliche gasthofen t bloud onder de noagels vandoan.<br />Zol het den nait wat wezen om onze recreatief ingestelde oosterburen te vermoaken mit volkstümlich daansende Bisamrötten? Middelaiws kenon schaitende wasserkaninchen? Het haile germoanse bejoardenhoes wodt aangenoam verpoost, de vreugde keert wieder en unsere alten zoepen en vreten zok de pokkel vol mit schnitzels en pfirsichtsaft.De röddevaanger van Hoameln mit zien floitje ropt t peerdespul doarnoa tot de orde en loat de boudel oafmarcheren noar de kantine in oafwachten van de volgnde bus oet t Ruhrgebiet. Deur de nije regeling om de mura’s te loaten leven is Bourtange promoveerd tot de eerste röddevrijploatse van West Europa en oet hail Nederland en Duutsland stromen de ondatra’s Boersjetange binnen. In de grachten van ons steernvörmeg vestingdörp wonen binnen de körtste keren honderden hoarege vrundjes. Hail Boertang is van de ratten besnuvveld, der is zulfs n rat van elf en de niksvermoudende toerist zit in dit nijmoodse pretpaark as n rat in de vale.<br />De vrizze bewoners van de grachten fokken as de knienen en langzoamerhaand begunnen de dieken van ons tröts garnizoensdörp wat te verzakken.<br />Ain behoarde makker kin in zien aintje n kuub zaand verzetten, doezend van dizze jonges kinnen n haile baarge zaand votgroaven en noa n haalf joar dainen zok in ons laif gezelleg dörp het verschiensel van wegzakkerij aan.<br />De teloorgang van n stibbe op de koarde, aan de raande van Nederland, Westerwolle en de beschoaving? Joa, de minsen van t rampgebied verloaten aine veur aine as rötten t zinkend schip. De veurgevel van s’Landshuys stait op in störten, t Oal kroegie verzoept in n veengat oet de tied van t Boertanger moor en de Mosqua’s zoas indioanen ze nuimen lachen zok te barsten.<br />Vandoage Boertang, mörn de haile wereld ropt de slimste en her en der in Noord Holland, Zeeland en Emmer Erfschaidenveen verdwienen trekkers, combines en aander boerenspultje op vrumde en gloepense manaren in de grond.<br />Deur de overmacht van muskusrötten zit de minshaid en de moatschappij in de rats, dieken breken deur, de randstad is onderlopen en Nederland is ain grode Blauwe Stad mit wotter tot aan de horizon. Muggen en nefies prikken zok onguur in aarms, wangen, kuten en aander minsenvlais.<br />Der zit mor ain ding op. Vluchten! Woarhin? Duutslaand? Zit ook vol nefies.<br />Ruslaand? Wil ons nait hebben.Somalië, Irak en Iran loaten waiten wel wat Hollanders op te willen vangen mits zai n inburgeringcursus volgen, nait in t oranje kommen en om viefe veur 12 drij keer toetern.Alex Visseringhttp://www.blogger.com/profile/13634407199439913887noreply@blogger.com0tag:blogger.com,1999:blog-21050049.post-26438872520450898762008-06-01T20:44:00.000+02:002008-06-01T20:45:10.708+02:00Noordmannen/VisseringsVisie/NieuwoldaHet is nou tied om onze rol in de wereld te heroverwegen en hier en doar beslissens te forceren dij t mondioal podium ons nait in daank oaf zol nemen.<br />As J.P. en kezorten op dit moment en benoam aander weke en meschain de weke doaropvolgend de moud biemekoar schroapen om tegen Europa te zeggen: ‘Bekiek het mor! ‘ siddert der n trilling van baangeghaid deur ale laanden van oost noar west en van noord noar zuud. Ze schieten zeuven kleuren stront en Sarkozy mit zien schiere poedie zol in ain keer tot snötneuse degraderen, Gordon Brown, dij t aal stoer genog het, verbaid ale contacten mit Hoek van Holland en spoit zien gedailte van de tunnel vol mit pur. Angela Merkel droagt n swaade zunnebrille omreden zai lopt de haile dag te reren as n klain verwind kind.<br />De Veiligheidsraad der verenigde naties hôllen de aine crises vergoadering noa de aandere en laanden as China, Brazilie en Lichtenstein binnen veur t boycotten van het Keuninkriek der Nederlaanden in de roemste zin en op ale fronten. Onze vervoarleke oetstroaling doun ain lieners as:’ Goa van mien laand oaf ’ en ‘Hé doe, wat mot dat hier ’ herleven en staarvelingen bezitten inains t charisma van Michiel Adriaans zoon de Ruyter en Donald Duck.<br />Nederlanders dij toch t lef hebben noar t boetenlaand te goan wodden behandeld asof ze superieure luu binnen en vingers, aarms en aandere lichoamsdailen verdwienen massoal in plekken woar gain schilderijen haangen.<br />Bie de Marktkauf in Meppen en de Familia in Leer is de Frankfurter, de Hamburger en de curryworst verdrongen deur de berehap, petatje oorlog en broodje kroket.<br />Elke nait Nederlandse europeoan kinnen vloeiend: ‘Broodje ei mit ui’, zeggen en op ale cultuurhistorische gebaauwen in Europa klinkt Hazes.<br />De Nederlandse regering besloet om Amerikoa de oren te wazzen en nait langer aan de teugels van dizze failliete noatie te lopen.<br />Onze jonges wodden stante pede oet oorlogsgebieden teruggetrokken en George Bush likt de hielen van Wolter Kroes, Wolter Kroes van Rachel Hazes, Rachel Hazes van de ploatenmoatschappij en de ploatenmoatschappij is weer n onderdail van t systeem woar wie de kommende moand in verkeren.Bie Google Earth is paniek oetbroken. Elke moal as de satellieten van dizze firma over Nederland vlaigen sloan de stoppen deur.De aandailen van euliemoatschappijen zakken in t moeras, banken goan kepot, bier febrieken nemen haile steden over, twaide haans cerrevan bedrievies goan de beurs op, de partytentenbranche breekt t aine record noa t aandere.In de wereld van de wereld is Nederland totoal van de pot gerukt en ale orthopedagogen, psychologen en anderssoortege zielekniepers liggen en masse in t kuuroord van Bad Neue Schans.Ale theorïen hoalen bakzail en de toaie stof oet de bouken van Sigmund Freud, William James, Carl Gustav Jung, Alfred Adler en DR. Phil binnen geliek niveau Nijntje en Koken met sterren.<br />De universiteiten lopen leeg en de jeugd dij volgens Aristoteles onze toukomst is sloet zok aan bie de rest der natie.Kleuren verblaiken as snij veur de zunne. t Swaad, rood , geel van de duutse vlage liekt n voag vözzeltje baumwolle in n wottereg oavendzunnechie, t gruine, widde en t rood van Itoalïe liekt op n pizzadeuse dij te laank in de zunne legen het en t blaauwe, t widde en t rooie van de Fransosen, ach ja, loat mor zitten.Nederland is in juni n soort reservoat mit fel gekleurde figuren, n leger van 16 miljoen hobbits.<br />Lord of the Rings in t oranje.Marco is Frodo en de rest lopt der achteraan.<br />Oranje boven, onder en opzied….Alex Visseringhttp://www.blogger.com/profile/13634407199439913887noreply@blogger.com0tag:blogger.com,1999:blog-21050049.post-57621844098665908312008-05-25T11:46:00.000+02:002008-05-25T11:47:32.713+02:00Noordmannen/VisseringsVisie/Noordmannent Is zotterdagmiddag n uur of twije as ik dit schrief. Wie binnen in Sulin in Noord Oost Polen net op n mislukte bijeneter missie west. Ze waren der nog nait.<br />113 soorten vogels hebben we al zain. In twij doage tied.<br />t Pension woar wie te gast binnen zit vol mit Engelsen, Duutsers en n stuk of wat Hollanders, woaronder wie.<br />De geur van versgekruud vlees gliert mie deur de neuse en de poolse bloudworst en andere<br />lekkernijen wodden in snel tempo en onder begelaiden van körde bevelen in t zoaltje noast mie transporteert omreden doar binnen n stuk of vief kindertjes sloagt veur het roomse geleuf. Zai hebben communie doan. Geklaid in widde trouwjurkies en pakkies binnen ze aannomen.<br />Reden veur feest. Dat hebben ze hier wel. Feest. Wie binnen hier n poar doage en elke dag wait Janek onze hotelboas en kumpel wel n reden te verzinnen om aargens feest over te vieren. In Polen gait dat soamen mit t drinken van wodka, wodka en nog ais wodka. Wodka is de motor woarop hier ales draait. Veural op het pladdelaand van dit prachtege laand het hier aarg onder te lieden. Zunder dit tovermiddel gait niks en kin niks. Ik betrap miezulf derop op dat ik noa n poar sikkom vloeiend pools proat en dat ik mit Pjotrek de achterbuurman van dit oosterse Fawlty Towers complede gesprekken voer over 4 en 6 cilinder motoren, zoegerveren en de abominoabele stoat van de windveren van zien zwieneschuurtje dij tevens as ontnuchterings hok bruukt wodt. Hai roekt ook as n zwien mor dat mokt nait oet je noar draank stinken. N Ontzettend oardege kiddel, ook as e nuchter is.<br />T Tempo van ale dag en de relaxte manaar van leven ligt hier wat aanders as bie ons en ik denk dat mie dit zo goud bevaalt dat ik alcoholisme wel op de koop tou nemen wil. Gusteroavend zaten we gezellig bie mekoar en waren mit ale Europese nationaliteiten bezeg aan ain toafel de diesel en benzine priezen nog hoger te moaken en Itoalie en Frankriek te diskwalificeren van voetbalwedstrieden en te royeren as lid van de Europese Unie. Weg dermit. Zulf de Duutsers waren t ains mit n minderhaid van Grunnegers, Polen , en hier en doar n verdwoalde Brit dij veur Liverpool was.<br />Bob mit zien Bull terriër Dozer oet Zoetermeer wuir inwaaid in ons plat toalgebruuk en t duurde mor eem of hai ruip de dove hond in t zuver plat grunnegs mit westers accent noar zok tou. En verhip, hai kwam. T Poolse sproakwotter haar zien waark weer goud doan.<br />In dizze ritselmoatschappij vuil k mie best thoes. Tuzzen kroanvogels, nachtegoalen, wolven, elanden en bevers is t goud aaier eetn. Zwientjes hangen hier bie de boeren nog op de ledder, t brandholt komt gewoon oet t bos en paddestoulen en aandere spul is nait om noar te kieken mor om op te eetn, van te genieten en gepaast gebruuk van te moaken.<br />Vuurtje braanden, bie ons inmiddels aal n misdoad van beheurleke allure is hier gewoon en s’oavends bie mekoar zitten om wat te proatjen en de dag deur te nemen vaalt in Nederlaand onder de categorie heftige therapie mit waaineg kaans op genezing.<br />Ik verheug mie op vanoavend de 16 maai 2008 as miljounen kikkers begunnen te kwaken as 100000 den padjes heur monotone geluud over dit reservoat klinken loaten en as de Noordse nachtegoalen mie in sloap zingen as ik haalf beneveld deur de alcohol doodprikt wor deur de nefies dij mie as vers aangelegde natuurreservoat behandeln. Schietpot, mit zoveul percenten in t bloud maark je doar toch niks van.<br />Mörn goan Bertus, Johan en ik noar n schutzenfest veur ex militairen en de kaans is groot dat aine van ons schutterskoning wodt, k Leuf degene dij t minste zoept kin t beste schaiten mor dit is veur t zulfde geld aandersom. N Onderdail van dizze wedstried is mitrailleur schaiten en Janek, onze hotelboas en kumpel het ons opgeven. Hai vertelde ons dit gusteroavend noa de twijde flezze, t kin dus ook pielebogeschaiten wezen. Wie zain t wel. Moandag goan we bootje voaren. Over de Bierbza en de Narew kommen wie op dizze wiese vlakbie de natuur dij ons mit de baide poten op de grond holt, ons bie de les holt en ons loat waarderen wat van belang is en wat wie belangriek vinden. Hier in dit schitterende laand van socialisme, katholicisme, alcoholisme en Leo Beenhakker.Alex Visseringhttp://www.blogger.com/profile/13634407199439913887noreply@blogger.com1tag:blogger.com,1999:blog-21050049.post-16492108733578686792008-05-12T17:00:00.001+02:002008-05-12T17:01:45.830+02:00Noordmannen/VisseringsVisieI.v.m. vakantie 11 mei en 18 mei geen Visserings Visie.Alex Visseringhttp://www.blogger.com/profile/13634407199439913887noreply@blogger.com0tag:blogger.com,1999:blog-21050049.post-50360895194627740842008-05-04T18:40:00.000+02:002008-05-04T18:41:15.307+02:00Noordmannen/VisseringsVisie/Midwoldat Haile joar heb ik mie wederom verheugd op de vrijmaarkt bie ons in t dörp.<br />Bie de kerke verzoamelt zok op keuninginnedagmörn de minshaid mit aanhangers, bolderkaren en wupkoaren volloaden mit troep oet onze overdoagdege consumptiemoatschappij. Mouders mit klaidjes op de grond kammen het hoar van Barbie in de plooi, zetten Ken in de felrose Barbie Rolls Royce en de net in heur puberjoaren verkerende dochter schoamt zok hartstiike dood veur heur moe omreden heur vrundje stait mit zien pokdoaleg gezicht om de houke te kieken.<br />n Standje wieder stoan vishengels, computers oet t joar nul en n mountainbike oetstald en de man dij der achter zit kiekt asof zien leste uur sloagen is.<br />De aarfenis oet zien daarde echtschaiden en n mislukte twijde leg lag aan dizze economische malaise ten grondslag.<br />Hai mout de inboudel verkopen om zien overmoateg alcohol innoamequotum te kinnen financieren.<br />Het leed en t verdrait kist aan summege marktkroampies oaflezen.<br />De keunegin veroorzoakt veul psychische stress mit de aan heur opgedroagen feestdag.<br />Sjofel geklaide opkopers en slaauwe handeloartjes perbaarn heur slag te sloagen en baiden spot op ales wat wat heur goading is.<br />Mit de fris veur n prikkie kochde prulloarioa binnen ze koopman in Eelde of Zuudbrouk. Geel en rood keuper is oet, tin is in, veural as der n maarkie op stait.<br />De verzoameloars van teddyberen, olderwetse poppen en nostalgische blikken loeren en kieken geklaid in heur pastelblaauwe en beige fleeche vesten in t rond en de sinten jeuken heur in de buutse. Ze sloagen tou as der handel is. Mit bedroagen dij voak minder as n eurootje betreffen viert onze democratie hoogtij en as der eem gain handel dreven wodt mag de broadworst mit curry of de rookworst mit mosterd zok op roeme belangstellen verheugen.<br />Doar zit ik den tuzzen de medemens mit mien zolderoprumen. De schilderijen lopen veur gain meter en de koppies en schuddeltjes oet 1979 willen ze vergees nog nait mitnemen. n Old boukie van Arendsoog en Witte Veder heb k veur 50 eurosint verkocht mor de rookworst mit mosterd en de hamburger mit mayo en siepels hebben zo’n aanslag op mien kasgeld pleegt dat ik mien vraauwe stiekom om n poar buutssinten vroagen mout.<br />De kezeplankies veur 2 euro verkoop ik aan n omaatje dij vol medelieden noar mie kiekt en vroagt of wie verhoezen goan en de hockeystick en de GI Joe poppechies geef k aan jonkie mit, mit n oleke kop en snöt op de libbe.<br />t Oranje zunnechie laacht ons tou en de wereld is roem. k Krieg van mien buurvraauwe mit de Barbies n oranje tompouche dij ik zunder te klaaien min of meer noar binnen schoef.<br />Keuninginnedag in Nederland. Wat zitten wie te zeuren.<br />As der nou n opkoper komt dij mie vief euro veur de haile boudel budt is e koopman.<br />Schilderijen, bouken, tichelwaark, fotoliesies, speulgoud van de kinder dij net thoes oet binnen, n peerdedeken vol mit mooie herinneringen, kussentjes oet Tirol woar de vlekken van de opgedreugde troanen nog in zitten, n hangding woar de leste 30 joar wel 500 keer tegen aan lopen bin.<br />Keuninginnnedag is n prachtege dag om de boudel materieel, emotioneel en rationeel op te schieren. n Bevrijdingsdag veur t zootje van de zolder en de rötzooi in de bovenkoamer. Hoera, hoera, hoera!Alex Visseringhttp://www.blogger.com/profile/13634407199439913887noreply@blogger.com0tag:blogger.com,1999:blog-21050049.post-61668522985357870942008-04-26T22:06:00.001+02:002008-04-26T22:06:52.976+02:00Noordmannen/VisseringsVisie/MeedhuizenMien trauma’s en complexen valen in vergelieken mit aandere minsen aigenlieks best wel mit. Ik heb gain slechte jeugd had,ik bin nait misbruukt en de snelkookpane van ons moe was aaltied goud vult, alhouwel stamppot knollen mie nou nog de stoepen op t lief joagen.<br />De geliekenis mit minsen dij t echt stoer had hebben wil ik hier den ook zeker nait moaken mor, ik heb der toch n poar.<br />In de eerste klasse van de legere school spijbelde ik al omreden de haile school was vrij behaalve wie en as zesjoarege vond ik dit onrecht, luip de school veurbie en ging noar n vriendje tou te speulen. Mien moe betrabde mie en s’oavends mos ik zunder eetn en op blode vouten op berre.<br />De juffrouw van de Hervormde Basisschool was aine van de olle stempel.<br />Ain vrijgezelle tante mit hoar op de koezen en drij laange hoaren op de pukkel op heur kinne. Ze kon gloepens vergreld over heur mit jampotbodems oetgevoerde brille hinkieken en as zai zag dastoe wat verkeerdst in heur ogen deedst sluig zai mit n linioaltje de knokkels van dien haand blaauw. t Was gewoon n rötwief, n kenau en n gefrusteerde hekse.<br />k Heb in 1976 de kaans had om heur dood te rieden mit mien besteleend mor dat vond k zunde van mien auto.<br />Oaf en tou wodt ik gillend wakker van dat mins dij inmiddels aal joaren nait meer onder ons is.<br />Mien twijde traumoatische ervoaren is oet dezulfde tied.<br />Op n Hervormde school mos je vrouger versies leren. Psaalms en Gezangen.<br />Ain moal in de weke op vrijdagmörn wuirst overheurt en as t nait tot de kop oet konst kreegst n onvoldounde.<br />Dit wuir mit n soort ingetogen sadisme op dien rapport vermeld en noast gedrag en vlijt vonden de meesters en juffen het tot de kop oet leren van christeleke liederen ain carrierebepoalend item omreden de moate woarofstoe het laidje opzeest kon wel ais belangriek wezen veur dien ploatse in de hemel of astder n potje van muikst dien stee in de hel. Mit t vingertje omhoog wuir de haile klasse chanteerd mit spreuken, one liners en bangmoakerij oet de noam van de voader, de zeun en de hailege gaist.<br />Mien antipathie veur geleuven, zweeftoustanden en andere goocheloarij is doar begonnen. De harsenspoulerij van onze leroaren is bie mie nait over kommen en ook op de middelboare Christeleke ULO betrapte ik voak meneren mit gore praktieken en vunzege gedachten.<br />De kadde wuir voak in het duuster knepen en der mog veural nait over proat wodden.<br />Mien aigen teksten kin k nait oet de kop omdat ze mie vrouger vernailt hebben mit:<br />De dorre vlakten der woestijnen zal zich verblijden eindeloos, de zandzee zal herschapen schijnen want bloeien zal zij als een roos. Gezang 111 achtervolgd mie as n schare in de nacht, mien haile leven al.<br />Wait n joe wat aangorden is? Ikke nait! Is het goarkoken? Het t mit görde te moaken?<br />Stait dit waarkwoord in de grode Van Dale? Gereed maken den mor, dat zol t wel wezen.<br />t Ainegste nummer wa’k tot de kop oet kin….<br />Gord u aan , Gord u aan, volk van God waarop gewacht?<br />Sla ineen de broederhanden, dring in s ‘Heren Jezus kracht<br />Op! Hij zelf bereidt voor u de baan, Gord u aan. Gord u aan.<br />Zoas ik al zee, mien trauma’s en complexen valen best wel mit.Alex Visseringhttp://www.blogger.com/profile/13634407199439913887noreply@blogger.com1tag:blogger.com,1999:blog-21050049.post-70017530073696101762008-04-20T12:11:00.000+02:002008-04-20T12:12:56.513+02:00Noordmannen/VisseringsVisie/Weite(Vlagtwedde)De gruine woas wodt zichtboar in het landschop. t Veujoar staait op barsten.<br />Dizze oafgelopen weke stonk t boerenlaand. De Broabantse mestbaronnen sturen heur colonnes mit noar aceton stinkende kibbestront, t aaltied gezellig roekende zwienejirre en t olderwets meurende odeur van t sympatieke koiestront noar ons gebied tou.<br />Trucks mit grode tot de raand gevulde tanks drukken mie van de weg oaf om mit behulp van de GPS t goie stuk laand te vinden.<br />Zulvermeeuwen vlaigen massoal achter de injecteurs aan, baiten wodden zaait en eerdappels poot. De mooiste tied van t joar. De gruine sluier van nij joar wodt mit de dag staarker en der ontsproeten gain 15 of 100 bloadjes oet de takken, nee, miljounen, miljarden bloadjes in ale denkboare kleuren, van hail lichtgruin tot hartstikke donkergruin zain t daglicht in Prilmoand van 2008.<br />N Zweem van winst en nostalgie mokt zok van mie meester as ik in Veelerveen n boertje op n old Fergusontje t laand zai plougen en n leutje glimlach tovert zok om mien mond bie t zain van de eerste vole bie de peertjes in Wolgnhoezen.<br />Toentjekiddels hebben sloaplantjes al poot en de eerste riegen spinoazie kommen der deur. Niks gain plougen of trekkertjederij. Omgroaven mit n vurge is de boodschop. Aalgedureg eem n drup van neuse wrieven en stoef deurgoan omreden mörn mouten de vrougen derin. de Woudster en Irene’s stoan te kiemen in t stookhok in eerdappelkissies oet t joar nul van de veurege aiw.<br />De swaalfkebloumkes stoan massoal in potten en toentjes terwiel dat de tudeletoanen, salvia’s, fuchsia’s en geroaniums nog in de kas of de folder van t grootwinkelbedrief stoan. Eerst moederdag oafwachten, den maggen de ainjoaregen der pas in. Ik neurie de godganze weke al: Als de lente komt dan stuur ik jou tulpen uit Amsterdam en as ik de kieviten, kievit roupen heur, de swaalfkes over t wotter zai scheren en de muskusrötten mit tozzen gras in de bek noar heur hole zwemmen zai wait ik dat dizze tied de minsen vrolijke mokt. Weg mit dat gezeur, stoppen mit dat aiwege gejeuzel. Kiek in de spaigel, geef diezulf n beste schop onder de kont en goa van ommedag noar boeten. Lekker n endje lopen of fietsen deur Westerwolle, t Middag Humsterlaand of t Oldambt. Schudt dizze net gain winter van joe oaf en geniet van onze wereld zunder, oorlog, eerdbevens, rampen en lawines.<br />Verwinde sikken dij wie binnen, wie wonen in t rustegste dail van onze ruirege wereld, kloagen stain en bain, zoaniken over t waark, jammern over sinterij, lamenteern over de reloatie en weekloagen over consumptieve hikhakjederij en folders over verre raizen en overzeese bestemmingen. Wakker worden! Vergemie nog aan tou! Noar boeten rötkoppen, aan t zuurstof, zoeg de vrizze lucht in joen longen ! Griep de wandelschounen oet de wandelschounenkaaste en pomp de baanden van de fietse zo haard op dat ze net nait knappen.<br />Besef dat dit allemoal groatis is en besef ook dat mit n poar weke de asperges kloar binnen. Asperges, widde jonges oet t zaand van onze grond, lekker hur!<br />Het widde gold, t culinaire hoogtepunt van t joar komt der aan. Ik heb zin om mie te loaten rekruteren as aspergestekert op Westerwolle mor dat dou ik lekker nait. Ik eet ze wel op. Het veujoarextasemoment veur mie binnen asperges mit gesmolten botter, n medium gebakken beverrötten steak mit nije eerdappeltjes ook overspoult mit gesmolten knoflook botter. Hiep, hiep hoera veur t veujoar!<br />O ja, kiek oet veur motorclubjes en cabrio’s….Alex Visseringhttp://www.blogger.com/profile/13634407199439913887noreply@blogger.com0tag:blogger.com,1999:blog-21050049.post-41700670995159030602008-04-13T12:43:00.001+02:002008-04-13T12:43:36.353+02:00Noordmannen/VisseringsVisie/FroomboschIn Billund is t ooit begonnen. Billund ligt in Denemarken en dit dörp is bekend vanwege zien Legolaand. In 1988 of 1989 waren wie doar mit de kinder tiedens onze vekanzie en natuurlek mozzen wie noar t parredies van de blokkies, Legolaand.<br />De ingang was n soort foeke mit negen kassa’s woar honderden jonge gezinnen heur kinder in toom perbaarnden te hollen.<br />Wie ook. Onze zeun en onze dochter zagen Hans Christian Andersen ons aal toulaachen vanoet t paark. Doar is t begonnen. Mien allergie tegen riegen.<br />As n schoap in n rij stoan tuzzen jaankde grommen, in de riege tuzzen t pedagogisch gemurmel van paps en mams. As n stel haalve zolen stonden wie doar n haalf uur voutje veur voutje te schoeveln om den bie ain van de negen kassa’s in ain moal sikkom 2oo gulden lichter in ain soort Madurodam van taferelen en pretpaarkprodukten ons gelok te zuiken. Het Slagharen van Denemarken was veur mie n traumatische ervoaren en doar heb ik miezulf beloofd de rest van mien leven lange riegen en colonnes te vermieden.<br />As op de Sellingerstroade tuzzen Troapel en Selgn drij auto’s achter mekoar stilstoan neem ik n omweg of ik goa stiekom langs t maaipad van de sloot mien weg vervolgen.<br />Mit t bloudprikken in t zaikenhoes kom ik op n tiedstip dat der gainaine zit of ik koop de boudel om, om mor nait in de volte van de medemens en jeuzelkonten n nummertje te trekken en te zain dat mien nummer nog lang nait aan de beurt is.<br />De ainegste riege dij mien gemoud tot grode vreugde bringen kin is n reeks aaierbalen, vleeskroketten en frikandellen bie de petatboer of de overbekende mure in Stad. Vrouger op middelboare schoule was de volgorde van kaizen in t oapekooi team en het soamenstellen van het handbalelftal n crime in mien ogen.<br />De lange dunne sportieve type’s oet de Mussel haren dudelk de veurkeur boven de wat körtere, stevege middenstandkinders oet Muzzelknoal en doarum was mien funktie achter in de riege dije, variërend van reserve grensrechter tot daarde reserve theezetter. Proat mie der nait van.<br />Zulfs bie de militaire dainstkeuren ston ik achteraan en beloofde miezulf dat ze mie nait kregen. Noa twij moal n herkeuren in t Academisch was t kloar.<br />Volledeg ongeschikt. En dat bin ik ook, volledig ongeschikt om mit mien volle, haalve of gain verstaand in n rij van dingen achtermekoar in n bepoalde volgorde te verkeren woar mien klaaine harsencellen zo van opstipaaieren, reagaaieren en panikaaiern dat ik finoal inzak. Weg mit de riege! Alhouwel?<br />Wat mie dizze weke overkommen is, is hoast nait te leuven. Der muik zok n ainstemmeghaid van mie meester woar of k zulf baange van wuir.<br />Aan raaize noar ons prachtege overbevolkte Randstad, doar woar onze ekonomie hoogtiij viert en woar de wereld begunt kwam ik tot inkeer.<br />Harmonie is het toverwoord. Aindrachteghaid mit de randstedeling. Dik, dun, swaad, wit, islamiet of christen, de lotsverbondenhaid was groot op dizze deurdeweekse dag in ons geweldeg tolerant en gezellig kneutereg kikkerlaand .<br />Tröts as n paauwe was ik deur zoveul solidariteit. De neuzen stonden allemoal dezulfde kaande op. De verbondenhaid was groot. De blik massoal noar t westen en ik was der bie.<br />Ik stond in n file van 9 kilometer veur Rötterdam….Alex Visseringhttp://www.blogger.com/profile/13634407199439913887noreply@blogger.com0tag:blogger.com,1999:blog-21050049.post-86413970335057988762008-04-06T14:26:00.000+02:002008-04-06T14:27:40.390+02:00Noordmannen/VisseringsVisie/OudeschipDe veurkaande, doar gait het om. Kiek mor ais noar Duutse boerderijen.<br />De oetstroalen veur t hoes is aine van nije riekdom, gruine trekkers en auto’s mit steerns op de motorkabbe terwiel achterthoes de strontbulde, n stoapel old iezer en aander troepiederij in t oog springen.<br />Ik vergeet nooit meer de tied dou ik as Top-40 artiest mit n bandje het laand deurtrok om minsen te vermoaken mit: Padadada van the Simple Minds en Hestoe mien zwien ook zain van de Dutchboys.<br />In het aaltied zunnege Barger Oosterveld leken de wichies aan de achterkaande allemoal op mekoar, t konden twijlingzuskes te wezen. N Jenteg topje mit n strakke blaauwe spiekerboxem en n grode bos geblondeerde krullen. Veural dij krullen en dat geblaikte hoar vuil ons as muzikanten en ervoaringsdeskundegen slim op. T Bleek achternoa dat Tina Turner en Kim Wilde de regionoale kappersschoul zo beinvloud hebben dat de oafgestudaaierde kapsters in Zuud Ooost Drinthe n nije look veur t pladdelaandsdiscotheek bezuiksters ontwikkeld haren.<br />Mooi of maal, dik of dun ze leken aaltenduvel op mekoar en wie haren veul te kieken. De veurkaande doar gait het om. De eerste indruk dij wie van mekoar hebben is over t algemain beslissend veur de manaar woarop wie mit mekoar omgoan. As dien uterlek aans is of vaalst boeten de boot wost harteloos oafstraft en discriminaart. Wie perbaarn dat deur allerlei wetgeving te veurkommen en tegen te hôllen mor in de daren wereld waarkt dizze wet van de oapies kei en kei haard. k Zag veurege weke n poar Shire peerden,t grootste ras dij n Shetlaand pony van n meter hoog n pak sloage gaven. Gewoon omdat e der anders oetzag kreeg e van drij man sloage.Net minsen. De veurkaande is de schierste kaande. Het front is belangrieker den de kont. Wie beoordailen mins en ding op de veurgevel. Zo liekt de nije Bentley op Keunegin Elizabeth, De Mercedes van mien overbuurman op Karl Heinz Rummenigge, t ainpittertje van Rouppé oet Veelerveen dut mie denken aan t bulldoggie van mien nichie, en de nijste Kia oet Korea het sikkom t aigenste proememondje as mien Tante Klara oet Exloërveen. De Volvo van mien kammeroad het t zulfde bekkie as n muskusrödde van n joar of drije old, de rimpels van de Fiat Multipla doun mie denken aan n operoatie dij misoatjet is en de olderwetse mini cooper het n proelbekkie. t Is net of e constant aan de libbe trekt.<br />Dr.Hook and the Medicine Show wollen in 1974 mit ale geweld op de veurkaande van de Rolling Stone, op de cover van t Dagblad van t Noorden stait n foto van n chinees dij noar Troapel lopt.<br />Wie hebben niks aan slechte veurkaanten. Ze mouten schier, eerlieks en zuver op de groad wezen en nait fout. k Kom hom te voak tegen op de veurkaande. Geert Wilders.<br />Dat is dij man nait weerd.De achterkaande van t geliek is de discussie dij wie aangoan mit mekoar en dat is goud. De gedachtengang van dizze man is levensgevoarlek en heurt nait op veurkaande, nait op de strontbulde, nait in de gruine of grieze container.<br />De gedachtengang van dizze malloot mout op de veurkaande van‘Mein Kampf’.<br />n Bestseller net as de biebel en de koran….<br />O ja, nog wat, Rita Verdonk. Is nationoal socialisme hetzulfde as nationoal liberalisme?Alex Visseringhttp://www.blogger.com/profile/13634407199439913887noreply@blogger.com1tag:blogger.com,1999:blog-21050049.post-63230761218707140232008-03-30T15:06:00.000+02:002008-03-30T15:07:11.963+02:00Noordmannen/VisseringsVisie/WagenborgenAs projektontwikkeloar veur gevleugelde vrunden heb ik n aantal nije wooncontingenten ploatst. In het veuronderzuik bin ik tot de conclusie kommen dat oranje liesters en tjakkers massoal mien laand boycotten omreden zai emigreren noar Skandinoavïe. Massa’s trekken over, dag en nacht gait dat deur. Honderden, doezenden asylzuikers, emigranten ,remigranten en allochtonen vlaigen de wereld rond t vreetn achternoa. Ik heb mie doarum in mien experiment concentraaiert op de vogels rond het hoes. Dij makkers dij de zoadbalen en de broodkörsten weghoalen, zok mor zeggen.<br />Tiedens het hoalboarhaidsonderzuik van de olle nijbau achterthoes heb ik as dictoator en hypotheekbetoaler van dit perceel besloten de vogel onderkommens van slechte kwaliteit en mit verödde kozienen te transportaaiern noar de voelstört in Troapel woar ik veur vief euro per keer mien overmoatege weelde lozen kin. Grof voel in de grode en aandere materiaolen in de doarveur bedoulde containers.Mit piene in t haart gooide ik t vogelhokkie woar de blaauwmaiskes elk joar in zaten in de grode iezern bakke.<br />Ik vuilde mie geliek de leedaanzegger van t geweldege Ganzediek. Der gait wat deur joe hin op zo’n mement. Gooist n stukkie geschiedenis vot. T Vogeltje zulf het der gain wait van mor t is veur mie emotionaile t oafsloeten van n periode.<br />Joarenlaank kwamen der tientallen jonge maiskes oet de goaten van dizze riante hokkies. Kraaien en oaksters haren t mit dizze lekkere keurslagter op loopoafstand t goud bie mie. O, denneboom, o, denneboom achter in toene was de oetkiektoren en de oetvalsboases van de voelnismannen van de natuur…. De boudel is herstrukturaaiert deur t ophangen van n stuk of vief nije nestkassies. Architectonische hoogstandjes in de wereld van het toenvogeltjes genootschop. Model ‘Westerwolde’ het n gat zo groot as n olderwetse knaak, dus geschikt veur iemenpikkertjes. Model ‘Oldamt’ is mit n opening zo groot as n gulden t maist pasend veur t blaauwmaiske en om in de voart der volkern mit te goan in nijmoodse ontwikkelings plannen heb ik in overleg mit de holtpikkersgilde van de Troapeler bossen besloten ook n blaauwe holtpikkerkaaste te ploatsen om de integroatie tussen de soorten te bevordern. Model ‘Veenkoloniën’ is specioal veur dit projekt ontwörpen en ik bin in overleg mit t roversgilde “ Ales op de cracker” , swaade kraaien, gaaien en oaksters om n penthouse te realiseren mit zicht op t nijbaauwbuurtje achter mien hoes.Het POP is hier veur opricht. Overleg mit de roofvogels in de buurt om vrizgeboren vogeltjederij gedailtelek mit rust te loaten, zodat der toch hier en doar nije aanwas is. De reden is natuurlek om leegstand te veurkommen en de sancties binnen nait mis. Het POP comité hoalt de boudel in de smiezen. Ast verkeert gait kinnen ze ingriepen. Het POP het permissie lik op stuk belaid oet te voeren. POP betaikent: Pak op pinze. Kraaien geven bie n overtreden oaksters laaiter en aandersom. In mien enquete bin ik nog op n probleem stoitert. Ik wait dat dit in de provincie gevuileg ligt mor ik wil t er toch eem over hebben.t Keudeldoemke. t Keudeldoemke is nait te ploatsen. Ondanks zien guteg en laif uterlek gait e zien aigen gang. Der is gain laand mit te bezailen. Ik heb perbaart dit iepenkrietje in model ‘Zuud Oost Drenthe’ en model ‘ Fraisland’ te ploatsen mor t trekt zok van de haile wereld niks aan.<br />Net as dij aandere, dij der aal in wil en doarum aal tegen t roam tikt.<br />Juust dije…..Alex Visseringhttp://www.blogger.com/profile/13634407199439913887noreply@blogger.com0tag:blogger.com,1999:blog-21050049.post-14983820077440593112008-03-23T14:08:00.000+01:002008-03-23T14:09:28.021+01:00Noordmannen/VisseringsVisie/Boerakkern Moment veur diezulf doar gait dit over. Veur de aine is dit n n lange wandeltocht in storm en regen langs t Pieterpad en veur d aander n mörn noar n dobbertje stoaren in de felle zunne aan de wieke.<br />Wie hebben allemoal ons aigen rituailtjes. Klaine dingkies dij n aander nait wait.<br />Zo binnen der luu dij specioal mit t rechter bain oet berre stappen omdat ze leuven dat, as ze dat nait doun de himmel noar beneden komt en ongeluk en verdrait heur dail is.Kist ook gezoamelek minseleke frutsels oetwisseln in proatclupjes en georganisaaierde therapeutische verainens.<br />Nait wieder vertellen hur mor ik proat as ik in t veld bin in miezulf.<br />Ik vertel mie wak doun mout, woar of k bin en oaf en tou vertel k miezulf n goie bak, zodat ik goadesloagen deur kieviten, robientjes en gele gorren hailemoal in n deuk lig.As der koien in t wailaand lopen spreek ik ze tou. Eerst zachies en doarnoa mit woare stemverheven redenoatie techniek. Ik perbaar de wichter zo te beruiren dat der twaispalt ontstait en dat ze huppelnd in groepjes van drije oetainvalen.Slechts boegeroup is den mien loon en ik lach mie de buutse oet.<br />T Is stief belangriek dat elk individu wat dut wat de rest van de wereld nait van hom of heur wait. Ik bedoul hier gain slechte of criminele dingen mit mor, zoas ze dat zo mooi zeggen: Therapeutische handelingen. Meneuvels woar dien binnenste ‘ik’ beter van wod. Gain oppervlakkeg massageknutsel mor daipere gedachten dij wie minsen bie ons droagen en mouten koesteren zoas t bloumpie en de ieme en zoas t peerd en Ome Loeks.<br />Zieleknieperij hait dat, de psyche van de mins beruiren, proaten over dien kindhaid in n proatgroepje, over dien versloaving, angst, dreumen en nuim mor op. Professionele luu binnen der om ons doar de weg in te wiezen. Gelukkeg mor!<br />Elke zokzulf respecterende HBO er het tegenwoordeg zien aigen therapeut.<br />Zittend op de grond in de Winnetou zit of proatend tegen bomen dij in t bos stoan vinden wie onze weg in dizze geestelijke wirwar van geneeswiezen en TiTa tovenoar praktieken.<br />De Jomanda’s en Tjakka’s vlaigen ons deur de snorre, hekserij en beunhoazerij in de geesteleke gezondhaidszörg vieren hoogtij op de RTL en en SBS’n.<br />Jezus en Allah kinnen wel inpakken. Het gait hier om Uri Geller, DR Phil, en foute tillevisie dominees. De Fred Kapsen van de moderne tied verneuken en bedraigen de massa. De massa dij schoapachteg achter dizze koukebakkers aansjouwen en vervalen in geesteleke en financiële nood omreden de kuur van dizze laaielichters is goud veur mor twij uur bevrediging.<br />Doarnoa is t weer kommer en kwel in de bovenkoamer. De maiste harsens binnen overstuur en de psychische nood is hoog, zo hoog dat therapeutische geneeswiezen hun Wotterloe vinden in de voelnisbakke en de WC pot.<br />Slechts de horoscoop van de Libelle kin hier helpen.<br />Ik heb de oplössen veur dit algemain probleem!<br />Dizze oplössen is al zo old as de weg noar Rome en het mie der verschaiden moal deurhin sleept as ik in n geesteleke dip zat.<br />t Is wel bie de wet verboden .<br />De beste therapie van de haile wereld is vuurtjebraanden.<br />Perbaard mor ais,vanoavend, tegen n uur of aachte….Alex Visseringhttp://www.blogger.com/profile/13634407199439913887noreply@blogger.com0tag:blogger.com,1999:blog-21050049.post-18520222245519003992008-03-16T12:38:00.000+01:002008-03-16T12:39:10.951+01:00Noordmannen/VisseringsVisie/Termunterzijln Doffe dreun bie mien veurdeure in de gange, de teckel dij tekere gait. Ze liggen verspraid op de madde.De folders veur mie, consument.<br />Twij moal in de weke gebeurt dit. n Stikker op de deure da k gain recloame wil dou k nait omreden da k ze lees, de boukwaarken en kraanten van veural de grode hobbyzoaken, zeg ik ….<br />Wat mie opvaalt as wie voage kennissen, femilie en aandere luu mit n onverwachte veside vereren, dat wie allemoal t zulfde hekkie, design zunneschaarm en twij onooglijk grode voazen veur de roeten stoan hebben woarmit ik wil zeggen dat de invloud van recloame folders overdudelk in ons leven zien intrede doan het.Hier komt e den: De nijste trend veur wicht en vent, jawol, de alarminstalloatie.<br />De alarminstalloatie het overwonnen.Tot veurkört haar alleneg aine mit n poar beste stuver zo’n ding, tegenwoordeg mouten wie allemoal ons trötse bezit elektronisch bevailegen.Camera’s boven de deure, tillevisieschaarms in de keuken, noast de computer en op de sloapkoamer.<br />Vaileghaid doar gait t om in dizze beroerde tieden van riekdom en overdoad.<br />Wie hoalen mekoar in de smiezen en dat t er oaf en tou midden in de nacht n sirene gait omdat de kadde van de buren het infrarood lientje deurkruust het, heurt derbie. Der binnen haile nijmoodse nijboauwieken dij mekander s nachts in de goaten hoalen of de stroalen en de frequenties van de ‘wireless watcher’ mekoar nait krusen in dizze zwoare tied van criminelen en inbrekers. Sloapelooshaid is n serieus probleem in de nijbaauw mit hypotheken boven de drij tön. Ze houen joe per slot van reken veur n doalder aal hartstikke dood!Mien oom in Zuud Oafrikoa het n mure om zien keet mit stiekeldroad woar stroom op stait en n geweer noast zien bere stoan. De bofkont.<br />De poort, dij automoatisch opengait is zien oetweg noar de rest van de wereld.<br />Ik bedoul mor.<br />Johanna, n old mins van in de tachteg dij aargens op Westerwolde woont het gaanzen. n Alarminstalloatie om Joe tegen te zeggen. Gainaine komt doar ongezain t aarf op en as ze löslopen valen ze die aan en moaken ze zoveul weure en lewaai dast gaauw t hoazenpad verkaist.<br />De rottweiler van JB oet Vraischeloo kiekt dwaars deur die hin ast veur t prachtege smeediezern hek staitst. Mog het die toch lukken om doar binnen te kommen kiekt JB zulf dwaars deur die hin.<br />As onderzuiker van alarminstalloaties en oafschrikmethodes bin ik der achterkommen dat grint en n hond ideoal is. Grint moakt geluud ast er overlopst en n honden blaffen. Hier hebben onverloaten de pest aan.<br />As muskusrattenvanger der provincie Grunnen was ik oafgelopen weke in t Bourtangerveld bie n boerderij mit veul baisten.<br />De honden kwamen mit hinne keboal aanrennen. Mor n goie röttenvanger het aaltied hondekoukies bie zok.Dit was echter n oaflaidings manoeuvre………<br />Geert kwam parmanteg mor hail zeker van zien zoak op mie oafstappen en dwong mie mit zien grode oren plat aan de kop terug te keren noar mien bolide.<br />Geert mit zien dikke kop wol mie aan en geslijm van mien kaande over mooie krullen en hondekoukies mochten nait boaten.<br />Dizze alarmmethode was nij veur mie. Volgens overlevering is Geert n boerenknecht of n Belgisch peerd. Dizze Geert is n schoaperam dij ales dekt wat lös en vast zit.Alex Visseringhttp://www.blogger.com/profile/13634407199439913887noreply@blogger.com0tag:blogger.com,1999:blog-21050049.post-23888381342087537732008-03-10T09:02:00.001+01:002008-03-10T09:02:47.685+01:00Noordmannen/VisseringsVisie/WesterwijtwerdDe verloedering is begonnen. Wat aal joaren mit grode vreze vreest wuir is onze moatschappij inslopen en is nait meer te stoppen.<br />Zugst het in in alle socioale, economische en algemaien systemen gebeuren.<br />Bejoarden en senioren wodden aan hun lot overloaten omreden de verzörgers gain tied meer hebben aandacht aan de oldjes te geven.<br />Kinder wodden legoal dumpt in de kinderopvang mit wereldse noamen as kiekeboe en nijntje.Woonstchtingen en aandere instellingen produceren t aine noa t aandere belacheleke onderzuik.De media in Nederland lopt zok te verpietern aan de vissekomme van de Partij veur de Dieren, n nationoal verbod op 200 burka’s, RTL perbaart angstvalleg n boanenplan veur de losers van Talpa te bedenken en goa mor deur.T aine joar bezunegen en klaainer, t aandere joar geld over de baalke smieten en groter.<br />Wie binnen in Nederland zo wied deurschoten dat onze soamenleving op den duur vastlopt. In Amerikoa is dizze trend al langer aan de gang en kist het zain hou minsen op hoge posities zok manifestaaiern om op n criminele manaar n bedriefs of overhaids tak in stand te hoalen.<br />Corruptie is het grode woord en de doofpotten binnen zo omvangriek dat het ook nog deur elkenain accepteerd wodt.<br />Geld is de moatstaf en der wodt veur t oog van t klootjesvolk normoal mit mekoar omgoan mor onderhoeds hebben dizze widde boord criminelen n hail laand in heur macht. Kiek hou Bush noar de piepen van de multinationals daanst. In bedrieven binnen ze mit ciefers aan t goocheln, leg mie ais oet dat ze t aine joar sikkom failliet binnen en t joar doarnoa miljarden winst moaken. Dat kin nait. Doar is sjoemelt. En t gebeurt elke dag mor weer. Kiek mor noar de priesoafsproaken tuzzen bierproducenten, de bouwfraude, Microsoft zien monopoly positie enz. Wie waiten der gain road mit en kabbeln deur zunder te zeuren.Der is gainaine dij mit de voeste op toafel houwt en zegt: ‘ Stop !’<br />Da’s ook te loat omreden t is nait meer te stoppen.<br />In ale regegeringsvörms, democratie, monarchie, dictatuur en nuim mor op komt vroug of loat n kentering. n Vastloper, zok mor zeggen. t Kin nog wel viefteg of honderd joar duren mor dat het gebeurt is zeker.<br />t Is de leste 20 joar in Zuud Amerikoa, Azie en Oafrikoa gebeurt en t schierste veurbeeld blift de DDR en Rusland.<br />Het Sovjet systeem, de schriever Frank Westerman het t beschreven in zien bouk ‘Ingenieurs van de Ziel’, is ook ten onder goan aan drama en illusies.<br />De grootste verneukmoatschappij van de wereld begon mit lofdichten op grode wotterwaarken, ode’s en de beker veur de beste aarbaider, corrupte politici en extreme architectuur in s laands gebouwen, het boeten sloeten van minderhaiden, het opleggen van regels, veul regels en t mooiste vind k nog wel dat zukke wereldse systemen ten onder goan aan oafkörtingen en bureaucratie.<br />t Zel mien tied wel duren mor k mag der groag over denken.<br />n Mengelmous tuzzen democratie en feodaal mit n vleugje monarchie, zol dat wat wezen?<br />Willem Alexander as boas van ons laand mit allineg n twijde koamer mit de meuglekhaid aine noar hoes te sturen as e laigt en bedraigd?<br />Of Geert Wilders as premier.<br />Verplicht apaart schoolzwemmen mit n Burkina aan?<br />Zoas k aal zee: ‘De verloedering is begonnen’!Alex Visseringhttp://www.blogger.com/profile/13634407199439913887noreply@blogger.com0tag:blogger.com,1999:blog-21050049.post-86174811082813170942008-03-02T12:38:00.000+01:002008-03-02T12:39:36.433+01:00Noordmannen/VisseringsVisie/PeizermadeDe toal is geliek n plant of n daar. T Is aaltied in bewegen en nije woorden en begrippen doun heur intrede in onze nijmoodse wereld.<br />Elke femilie het zien aigen gebruukjes en woordgrapjederij en zulfs ons boerse dialekt schient n stuk of negen vörms te kinnen.<br />Op t Hoogelaand zeggen ze: vaaier, in Stad, vère bie ons, vare en kist mit vaire,vèr,en voier ook n hail ende kommen.<br />Mien voader zee aaltied: Mofopefozeoosobajoteoos wat zoveul betaikent as:<br />Maal volk, peerdevolk, zegt aal sokkenbataljon tegen ons.<br />En hai haar meer van dij stekken, as joe mie vertellen kinnen wat n amtampie op n kwarriewarriemeuln is?<br />Ik bedoul mor te zeggen dat wie nait teveul mouten verzaanden in n soort middelaiws grunnegers en nedelands en ik vind dus ook dat wie progressie en innovoatie in de toal n kaans mouten geven.<br />Lest pruit ik Grunnegers voor n schoulklasse mit kinder, pubers van n joar of dattien dij mie aan zaten te kieken asof ik zo van Mars kwam.<br />Achternoa vonden ze t best wel cool wa’k dee, hoop ik, mor kist maarken dat der n beheurlek gat zit tussen de kids en viefteg plus.<br />Ze proaten n soort abacadabra telefoon toal.<br />n Mengelmous van ABNederlands , oafkörtens en engels mit bewegens van de aarms en haanden.<br />Jonges en wichter binnen boys en smax en ast aine in t wild tegenkomst zeggen ze:’Jo, alles chill’.<br />Streettoal, zo nuimen ze dat, het verdringt in de Randstad al het gewone Nederlands.<br />Ik zat veurege weke zundagoavend mit n schriefblok en n penne veur BNN te wachten op het dictee der Nederlandse straattaal.<br />Mit jeugdeg elan, mit de tied mitgoand zat ik te takken mit mien poedie dij mie disse dee, en vruig of ales fokke bon mit mie ging. De dagoe dij mie veul doekoe kost het zat mie wat schoapachteg stoer aan te kieken.<br />Mit zien fokke sancha keek e asof hai watra zagen brongen en ale pieps in de nittie gingen in de bling,bling brasa der vandeur. Ik besloot doarum de fokke ploade te poetsen en licht te reizen omreden de pieps takken hadden dat der stript wuir.<br />N Chickie zee: ‘Alles bon’, tegen mie en ik geruik in oming dope om heur fokking fitje en besloot n visit te brengen aan Don om ais goud door je speakers te blazen.<br />O ja, ik zat mit n schriefblok en n penne veur BNN te wachten op het grote dictee van de Nederlandse straattaal en zakte noa n menuut al in.<br />Hip Hop is de boasis van dit fenomeen en tiedens dizze oetzenden gingen ale deelnemers nat, behaalve t wicht van Schuurmans.<br />Hier hoak ik oaf, hier kom ik nait meer mit en verzoep ik in n verregoande stoat van veroldering, ontknoping en woarschienlek ontbinding en nostalisaaier ik miezulf tot ain conservatieve Noordman.<br /><br />Shit, ik heb kakka aan de patta. Wie spit de takkie van de strata?<br />Fogging vet! See you later pieps!Alex Visseringhttp://www.blogger.com/profile/13634407199439913887noreply@blogger.com0