Noordmannen/VisseringsVisie/Eemshaven

Vrouger kwamen de kinder op zundagmörn sikkom veur dag en dauw bie mie op berre. Mit n kleurriek ingepakt aigen gemokt kedootje was dat n feest.
Verrekiekers van WC rollen, geprikte opgeplakte kunstwaarkies, de kleuterjuffen haren de leutje beudels weer tot grode doaden waiten aan te zetten.
Noa het officiële gedailte kwam de joarliekse ‘ontbijt op berre’ scène.
Mit veul gehannes en geklaai wuiren der wat broodjes en netuurlek beschuten noar binnen waarkt en het duurde mor eem en de krummels en de thee vlogen in t ronde.
De joaren noa het peuter en t kleuter gebeuren wuir invult mit cassettebaandjes en sokken en sunt joar en dag is voaderdag n nationoal kookdag wodden. Nou ja, poging tot koken. Voaderdag hait nait veur niks voaderdag.
Op dizze zundag gebeurt der wat mit de hormonen en mit de mentoale stoat van de gemiddelde man. Zien vraauweleke kaande komt veur de dag en zien territoarium drang wodt deur de aanwezeghaid van de barbecue tot grode hoogte stimuleerd.
Mannen, kiddels van Jan de Wit dij nog gain wotter kinnen koken ontplooien zok op voaderdag tot topkoks en dulden gainaine in de buurt van de vris aanlegde outdoorkitchen. Der binnen der gounent bie dij heur domein mit roodwit lint oafzetten en geklaid in schort mit oranje koksmutse perbaarn zai de wereld om heur tou versteld te loaten staon van de plotselinge kookkunst en de doarbie pasende meneuvels.
De Gordon Ramsey’s van Westerwolle, Herman de Blijkers van t Hoogelaand en de Jamie Olivers van Stad en Loug stoan mit voaderdag aan de top van de voedelketen zoas n hoaneschrobber in de locht en n zeearend in de vlucht.
Ze binnen op jacht west. As grode joagers oet de middelaiwen binnen ze noa weken veurberaiden der in sloagt om de prooi in te brengen.
Bie de ploatseleke slagter hebben ze n weeldereg grilschuddel bestelt terwiel de vraauwe bie n aander duutsachtege supermaarkt de leste T bones oet t schap trokken het.
Het grilfeest der voaders kin begunnen. Boven Nederlaand en Grunnen nemt de bewolking tou en het duurt mor eem en de eerste ainlieners vlaigen as rooksignoalen deur de lucht. ‘Moster ook mosterd op” en Wostoe mie de mayonaise en ketchup wel eem aanlangen?’, stoan in de top viefe en menneg indioane zol der jeloers op wodden.
Haalf verbraande broadworsten wodden massoal noar binnen propt en de in bouillon veurgekookte kibbepoten en vleugels wodden mit de neudege huzarensloatjes en bbq sausies votspoult mit biertjes, licht mouserende wientjes en felgekleurde nijmoodse draankies oet dizze tied. Als woare stamhoofden kieken voaders tevreden noar heur gepeupel dij zok in tien menuten te barsten vreetn en zoepen.
En de speklappen mouten nog…..
De mouder aller voaderdagraaiwe is de skuttelbraai. n Rond ding mit n gaspot der onder. Hai klopt, hai veegt en hai zoegt zok mor zeggen…..
De skuttelpruttel het t holtkool en t olderwets vuurtje verdrongen.
De pieleboge en de vuurbuks is tegenwoordeg de keurslagter en voaders binnen volgzoame types mit n laptop dij zunder tegen te spreken t vlais snieden, mouder de vraauwe volgen in meubelboulevard en op t waark en thoes niks te vertellen hebben.
n Man is van hoes oet n dikke joager, n roege gokker en n hartstochtelek pyromaan.
Gun paps ain keer per joar zien aigen brandje.
Gooi de speklappen der nou mor op…..