Noordmannen/VisseringsVisie/Ter Apel

Der binnen haile volksstammen dij zok noar de leste mode klaiden.
Mode is n toverwoord in onze oppervlakkege moatschappij en de klaaierwinkels of kolerewinkels pulen oet mit de nijste ontwikkelns aangoande de internationoale fashion moakt deur beroemde ontwaarpers en trendwatchers.
Is het t aine joar wubkoarntjeblaauw mit kanariegeel, n seizoen dernoa kin t wol pimpelpoars mit dunderwolken wezen.
N Jumper of vest, n boxem of n heufddeksel, de minshaid anno 2008 wodt overvouert mit wereldse fluoriserende kleuren en roeseltjederij en fiebeldekwinten woar of n kiddel van middelboare leeftied verlegen van wodt en zien kop den ook oafdraait, of zien ogen sloet en hail haard beeeehhh begunt te roupen.
Dat nijmoodse gedou en de make-overs op tillevisie is n rage aan t wodden.
Vraauwluu mit te grode neuzen, te klaine tietjes en n slechte jeugd wodden in zes weke tied ombatterijd tot blonde godinnen en kiddels mit dikke pinsen, haangde oogleden en drij onderkinnen lieken inains op Hannibal, de boas van t A-team.
Spiekerboxems huiven de boudel nait meer oaf te kniepen, nee, ze mouten zo roem zitten dat ze die sikkom van de kont glieren.
In mien tied van moatje 28 zat der strak om en van n roeme klotenzolder haren wie nog nooit heurt. Tegenswoordeg binnen ze der aal mit bandplooien.
Manluu dij op ketoor zitten hebben ze voak aan. n Nedde broek mit n bezoentje en n colbertje en netuurlek gain stropdaze, alhouwel dat nou ook mag omreden Wouter ook strikken droagt.
Veur mie as leek op modegebied en mit n aantal traumoatische ervoarens oet t verleden binnen de volgnde vaktoal leuzen en klaaier jargon mie tot op de dag van vandoage biebleven.
De spencer mit felgruine of gloepens oranje viscose bezoen, kiddels mit van dij rooie boxems aan en n gele truie over de scholders, de broekrok, het potentieverlegend geblokte gevoar mit doarin een huppelkut begonia mit designbrille, de reetveter, t onbenultje mit teveul eer en te waineg stof, de VVD geel-blaauwe stropdaze of de net iets te gevulde doame mit n legging aan en n te kört T-shirt.
Ik kin nog wel eem deurgoan mor dat dou ik nait. Zulf bin ik van de boxershort, de schipperstruie en stuutsiekoarnboxems in de kleur donkerbroen en boswachtertjegruin, schounen mit profielzolen hebben mien veurkeur en omreden dat ik veul op stevels loop bin ik kritisch op sokjederij.
Sokken mit rimpels boven op de voude wodden ritueel verbraand en olderwetse geitenwollen, zo joe willen zegewollen noorse sokken mit dubbele stiksels onder de voude verdwienen in de gruine container.
Mode keuningen, winkeliers, goeroe’s en fabrikanten, n sokke dij nait opkruld tiedens de wandeling, lekker waarm is en gain irritante ribbels,rabbels of robbels het, doar is t wachten op.
Wie vlaigen noar de moane, lopen noar de pombe, vrezen mit grode vreze, mor n echte sokke moaken...? Ho mor….