Tabe of nait tabe, dat is de vroage

Tabe of nait tabe dat is de vroage.
Ik betrap miezulf der op dat ik wel hail aarg aan t vergrunnegens bin.
Van ommerdag haar k vroaggesprek mit n wicht van de KRO roadio en dij vond mie mor n stoere kiddel.
Ik zit met de bla, bla, bla in zijn Landrover……. enz.
Doar heb k hom ook veur kocht mienwicht !

Zai leuven ales wa’k zeg, zo ist ook nog n moal en ik huif mor n stuk of wat ainlieners de ether in te smieten en ik wor beschuldigd van chauvinisme en nationalisme.
En woarom?
Godvergemie nog aan tou?
Omdat wies mit Grunnen bin. k Zai de vogeltjes vlaigen, de bloumpies gruien en ik perbaar van elke dag n schiere te moaken, en wees eerlieks, doar hebben veul luu muite mit omreden dat zai t zulf nait kinnen.
Is t nait den?

Wel kin noar zien waark hinrieden over n zaandloane?
Wel komt s mörns gain knipperlocht tegen?
Wel het de absolute vraihaid om n woord zoas doar is het Duutse woord “Habseligkeit” zunder blikken of blozen omtoalen noar het machtege Grunneger woord “Hebzoaleghaid” ?
Ikke!
As ik vind dat de zwarte, groene, grote bonte en kleine bonte specht in t Grunnegers, swaade, gruine, grode en leutje holtpikkers binnen den vind ik dat en den mot t swaade boukje van Simon dat in de volgnde drok vermelden.

Het vaalt mie op dat ik bie ale interviews t zulfde taimpie heb en dat ze t vreten ook.
Dus, ik kin ze ainglieks ales wies moaken.
Oaf en tou is der aine dij mie deur het en dat soort luu vroagen die t hemd van t gat en waiten wat mie beweegredens binnen.
Zai snappen echt woar t over gait.
De journaliste van Noorderland was ook zo aine.
Zai haar mie deur.
Da’s mooi, den kist over echte dingen proaten. Over t leven en over dood.
Over da ‘k zeunenentachteg joar wodden wil.
Over dat ik het verdom om in n keurslief van de moatschappij mit de massa mithobbel noar t ende tou om doar as n zombie d olle dag te slieten in de Meander te Veendam, Heggerank op Muzzelknoal of t Tuntlerhuus in Troapel.

Tabe of nait tabe, dat is de vroage…..
En nou ver de leste moal?
n Tjakker is n kramsvogel en olle Tjoard is de Dollard!