Noordmannen/VisseringsVisie/Noordmannen

t Is zotterdagmiddag n uur of twije as ik dit schrief. Wie binnen in Sulin in Noord Oost Polen net op n mislukte bijeneter missie west. Ze waren der nog nait.
113 soorten vogels hebben we al zain. In twij doage tied.
t Pension woar wie te gast binnen zit vol mit Engelsen, Duutsers en n stuk of wat Hollanders, woaronder wie.
De geur van versgekruud vlees gliert mie deur de neuse en de poolse bloudworst en andere
lekkernijen wodden in snel tempo en onder begelaiden van körde bevelen in t zoaltje noast mie transporteert omreden doar binnen n stuk of vief kindertjes sloagt veur het roomse geleuf. Zai hebben communie doan. Geklaid in widde trouwjurkies en pakkies binnen ze aannomen.
Reden veur feest. Dat hebben ze hier wel. Feest. Wie binnen hier n poar doage en elke dag wait Janek onze hotelboas en kumpel wel n reden te verzinnen om aargens feest over te vieren. In Polen gait dat soamen mit t drinken van wodka, wodka en nog ais wodka. Wodka is de motor woarop hier ales draait. Veural op het pladdelaand van dit prachtege laand het hier aarg onder te lieden. Zunder dit tovermiddel gait niks en kin niks. Ik betrap miezulf derop op dat ik noa n poar sikkom vloeiend pools proat en dat ik mit Pjotrek de achterbuurman van dit oosterse Fawlty Towers complede gesprekken voer over 4 en 6 cilinder motoren, zoegerveren en de abominoabele stoat van de windveren van zien zwieneschuurtje dij tevens as ontnuchterings hok bruukt wodt. Hai roekt ook as n zwien mor dat mokt nait oet je noar draank stinken. N Ontzettend oardege kiddel, ook as e nuchter is.
T Tempo van ale dag en de relaxte manaar van leven ligt hier wat aanders as bie ons en ik denk dat mie dit zo goud bevaalt dat ik alcoholisme wel op de koop tou nemen wil. Gusteroavend zaten we gezellig bie mekoar en waren mit ale Europese nationaliteiten bezeg aan ain toafel de diesel en benzine priezen nog hoger te moaken en Itoalie en Frankriek te diskwalificeren van voetbalwedstrieden en te royeren as lid van de Europese Unie. Weg dermit. Zulf de Duutsers waren t ains mit n minderhaid van Grunnegers, Polen , en hier en doar n verdwoalde Brit dij veur Liverpool was.
Bob mit zien Bull terriër Dozer oet Zoetermeer wuir inwaaid in ons plat toalgebruuk en t duurde mor eem of hai ruip de dove hond in t zuver plat grunnegs mit westers accent noar zok tou. En verhip, hai kwam. T Poolse sproakwotter haar zien waark weer goud doan.
In dizze ritselmoatschappij vuil k mie best thoes. Tuzzen kroanvogels, nachtegoalen, wolven, elanden en bevers is t goud aaier eetn. Zwientjes hangen hier bie de boeren nog op de ledder, t brandholt komt gewoon oet t bos en paddestoulen en aandere spul is nait om noar te kieken mor om op te eetn, van te genieten en gepaast gebruuk van te moaken.
Vuurtje braanden, bie ons inmiddels aal n misdoad van beheurleke allure is hier gewoon en s’oavends bie mekoar zitten om wat te proatjen en de dag deur te nemen vaalt in Nederlaand onder de categorie heftige therapie mit waaineg kaans op genezing.
Ik verheug mie op vanoavend de 16 maai 2008 as miljounen kikkers begunnen te kwaken as 100000 den padjes heur monotone geluud over dit reservoat klinken loaten en as de Noordse nachtegoalen mie in sloap zingen as ik haalf beneveld deur de alcohol doodprikt wor deur de nefies dij mie as vers aangelegde natuurreservoat behandeln. Schietpot, mit zoveul percenten in t bloud maark je doar toch niks van.
Mörn goan Bertus, Johan en ik noar n schutzenfest veur ex militairen en de kaans is groot dat aine van ons schutterskoning wodt, k Leuf degene dij t minste zoept kin t beste schaiten mor dit is veur t zulfde geld aandersom. N Onderdail van dizze wedstried is mitrailleur schaiten en Janek, onze hotelboas en kumpel het ons opgeven. Hai vertelde ons dit gusteroavend noa de twijde flezze, t kin dus ook pielebogeschaiten wezen. Wie zain t wel. Moandag goan we bootje voaren. Over de Bierbza en de Narew kommen wie op dizze wiese vlakbie de natuur dij ons mit de baide poten op de grond holt, ons bie de les holt en ons loat waarderen wat van belang is en wat wie belangriek vinden. Hier in dit schitterende laand van socialisme, katholicisme, alcoholisme en Leo Beenhakker.

Noordmannen/VisseringsVisie

I.v.m. vakantie 11 mei en 18 mei geen Visserings Visie.

Noordmannen/VisseringsVisie/Midwolda

t Haile joar heb ik mie wederom verheugd op de vrijmaarkt bie ons in t dörp.
Bie de kerke verzoamelt zok op keuninginnedagmörn de minshaid mit aanhangers, bolderkaren en wupkoaren volloaden mit troep oet onze overdoagdege consumptiemoatschappij. Mouders mit klaidjes op de grond kammen het hoar van Barbie in de plooi, zetten Ken in de felrose Barbie Rolls Royce en de net in heur puberjoaren verkerende dochter schoamt zok hartstiike dood veur heur moe omreden heur vrundje stait mit zien pokdoaleg gezicht om de houke te kieken.
n Standje wieder stoan vishengels, computers oet t joar nul en n mountainbike oetstald en de man dij der achter zit kiekt asof zien leste uur sloagen is.
De aarfenis oet zien daarde echtschaiden en n mislukte twijde leg lag aan dizze economische malaise ten grondslag.
Hai mout de inboudel verkopen om zien overmoateg alcohol innoamequotum te kinnen financieren.
Het leed en t verdrait kist aan summege marktkroampies oaflezen.
De keunegin veroorzoakt veul psychische stress mit de aan heur opgedroagen feestdag.
Sjofel geklaide opkopers en slaauwe handeloartjes perbaarn heur slag te sloagen en baiden spot op ales wat wat heur goading is.
Mit de fris veur n prikkie kochde prulloarioa binnen ze koopman in Eelde of Zuudbrouk. Geel en rood keuper is oet, tin is in, veural as der n maarkie op stait.
De verzoameloars van teddyberen, olderwetse poppen en nostalgische blikken loeren en kieken geklaid in heur pastelblaauwe en beige fleeche vesten in t rond en de sinten jeuken heur in de buutse. Ze sloagen tou as der handel is. Mit bedroagen dij voak minder as n eurootje betreffen viert onze democratie hoogtij en as der eem gain handel dreven wodt mag de broadworst mit curry of de rookworst mit mosterd zok op roeme belangstellen verheugen.
Doar zit ik den tuzzen de medemens mit mien zolderoprumen. De schilderijen lopen veur gain meter en de koppies en schuddeltjes oet 1979 willen ze vergees nog nait mitnemen. n Old boukie van Arendsoog en Witte Veder heb k veur 50 eurosint verkocht mor de rookworst mit mosterd en de hamburger mit mayo en siepels hebben zo’n aanslag op mien kasgeld pleegt dat ik mien vraauwe stiekom om n poar buutssinten vroagen mout.
De kezeplankies veur 2 euro verkoop ik aan n omaatje dij vol medelieden noar mie kiekt en vroagt of wie verhoezen goan en de hockeystick en de GI Joe poppechies geef k aan jonkie mit, mit n oleke kop en snöt op de libbe.
t Oranje zunnechie laacht ons tou en de wereld is roem. k Krieg van mien buurvraauwe mit de Barbies n oranje tompouche dij ik zunder te klaaien min of meer noar binnen schoef.
Keuninginnedag in Nederland. Wat zitten wie te zeuren.
As der nou n opkoper komt dij mie vief euro veur de haile boudel budt is e koopman.
Schilderijen, bouken, tichelwaark, fotoliesies, speulgoud van de kinder dij net thoes oet binnen, n peerdedeken vol mit mooie herinneringen, kussentjes oet Tirol woar de vlekken van de opgedreugde troanen nog in zitten, n hangding woar de leste 30 joar wel 500 keer tegen aan lopen bin.
Keuninginnnedag is n prachtege dag om de boudel materieel, emotioneel en rationeel op te schieren. n Bevrijdingsdag veur t zootje van de zolder en de rötzooi in de bovenkoamer. Hoera, hoera, hoera!