Alex Vissering

zondag, april 22, 2007

Noordmannen ( Visserings Visie)

As het veujoar wodt heb ik aaltied ain of twij doagen dat ik mie in het toentjegebeuren stört en mie met toeneerde, zoadjederij en bloumbakken vermoak.
Der staait bieslook in olderwetse potterie, dille in verrouste kolenkitten en de swaalfkebloumkes, viooltjes stoan in de terracotta gegloazuurde schoalen op de staigerplaankentoafel achterthoes op t terras.
Dizze buie van overmoatege hoeslekhaid heb ik mit t verstrieken van de joaren aal voaker.
Vrouger duurde t n dag en nou aal twij doage.
Vrouger was ik gain winkel in te houen mor nou goa ik broaf mit de vraauwe boodschoppen doun en begeef mie achter t karrechie as n volleerd hoesholder- lek inkoper in de schare van mien directeur en ekonomisch manager in allerlei supermaarkten en ketens met felle kleuren en dito noamen.
Hier zit m nou net de kneep. Kiddels, mannenbruiers, zai hebben ons in de buutse!
Wie binnen der instonken! Doe, ik elke kiddel is slachtoffer van de psychologen van de Aldi, Jumbo, Lidl en Ikea en de veule aandern.

Wel het nog nait het koffertje met ale moaten boren, bitjes en kruuskoppen?
Wel het nog nait de minischroevendraaierset in olijke ophangverpakking?
Eerlieks zeggen. Welke kiddel, welke echte kiddel kickt nait op de schuurtjes pruloaria van dizze grootgrutters.
Vingers opsteken!
Wel de oploadboare boormachine in rood, gries en gruin nait het dut nait mit.
Wie proaten op verjoardagvesides allineg mor over de koopjes in het mannenschuurtje.
As der aine is dij de boot mist het, dij weke den is hoongelaach zien dail.
De haspels, telescopische hegescheern, decoupeerzoagen,mp3 speulers mit ingebaauwd kompas, 109 dailege vishengelset, de snorkelset, spanningszuiker, wotterpas, goatenborenset het ligt bie mie in t schap. En ik bin der tröts op!
Dizze weke heb k nog distelsteker en n accugrasschere,strimmer,verticuteerder,hegeschere en krummeldaif scoort en ik kin de Fröbelmiddag nait oafwachten omreden ik heb nog gain fietsbodywaarmer, popcornmachine en geroaniumstront.
Kopies veur echte kiddels!
Bie mie int schuurtje heb ik n specioal schap veur de plestieken koffertjes met de diverse machines derin.
Mien stekkerdeuze is anderhaalf meter lang omreden ale adapters van mien aparatuur is kloar om te wodden gebruukt in klusjes in en rond het hoes.
3,4 volt tot 24.7 volt swaade blokken zitten in de riege aan t stroom en ik bin wel n uur per dag aan loop om dizze boudel in goie boanen te laiden.
Veur de dubbele koffers mit boren, zoagen en dopsleudelsetjes heb ik n apaarte plaanke moakt op ooghoogte. De snakplaanke.
As der n voage kennis of femilielid in mien schuurtje komt baid ik hom n te kold pilsie aan en begun geliek te bloasen over mien raive.
Ik zit mit ain probleem. K Heb dizze weke per ongeluk de rechtshandege achtdailege golfset mit regenhoes kocht.
Wel wil dij mit mie ruilen veur de spoitpistool van de terrasreineger?

zondag, april 15, 2007

Noordmannen (Visserings Visie)

Volgens de statistieken drinken wie ongeveer 101 liter thee per persoon per joar.
Veur de twijde wereldoorlog lag dit zo rond de twijhonderd liter per persoon en bepaarkte zok het theedrinken tot n poar soorten.
Wie hebben der in de loop van de joaren n hail rituaail van moakt en de commercie is der met n grode plons midden in sprongen.
Mos ik vrouger mit n theebuultje hin en weer, tegenswoordeg kin ik ainpersoons t/m zespersoons theezakkies kopen.
De smoaken allineg, wost nait goud van.
In elk restaurant krigst n segaredeuze mit allemoal gekleurde theezakkies onder de neuse drukt en den wodt der van die verwacht dastoe tuzzen nou en tien seconden n smoakje oetzöcht hest.
Gruine thee, goud veur de zog, donkere thee goud tegen exceem en schilvers in de boart, sinasappelthee mit n extra vitamine C-steut, en goa zo mor deur.
De dainstege studente vind t kissie aal zwoarder wodden en ik kin gain keuze moaken mit t resultoat dat ik per ongeluk pepermuntsmoak kais.
Gatverdamme, k haar nog laiver cactus of meloen den pepermunt.
Mor alla, mit onhandege bewegingen begun ik mit t zakkie in n glas hait wotter te frutseln en jau hur, t duurt mor eem en de toafel zit onder de thee.
Ales stinkt noar pepermunt en de appeltoarde stait in n sompeg badje van pislaauw wotter oet mien theeglas en de roomslag begunt van ellende te verzakken.
Dit, doames en heren is de theecultuur Anno 2007.
Geklootviool op de vaarkante centimeter, gekloetjeklaai van n leek.
N Man van de wereld dij vrouger groot wodden is aan de toafel bie zien mouder mit het beroemde koppie thee mit t meelkoekie, t meelkoekie in de thee luit zakken perbaarde hom der hail oet te kriegen mor tot zien grode schrik zag dat de helfte van t koekie in de thee verschwond, dij man zit hier mit n complex.
n Theecomplex.
Ik wait dat der fluoride, theïne en anti oxidanten in zitten en dat der n link is noar zaiktes en gezondhaid.
Ik wait ook dat de gemiddelde theedrinker veur mietje oetscholden wodt.
Kin mie niks verrekken, den mor n mietje, ik vind thee gewoon lekker.
“Thee Lex?” zeggen zai aaltied tegen mie en den zeg ik : “Oh, n koppie thee, lekker man. Dou mor, ast mor gain pepermunten thee is”.
Denken joe dat ik de nije dag mit staarke koffie begun?
Vergeet t mor!
Dizze man begunt elke nije dag in zien wonderschone leven mit n koppie thee, laifst rooibos mor Earlgrey mag ook.
Thee mit widde punten fiekedom, fiekedom, fiekedieriedom….
Rest mie nog de vroage.
Is n theedeskundige n theoloog?

zondag, april 08, 2007

Oetzenden (Noordmannen)

k Bin bliede dat wie der s’oavends uur bie hebben.
Kist mooi eem wat boetendeure doun veurdat t duuster wodt en het is bie mie zo, dat as de zummertied begunt , tillevisie noar t twijde plan verschoven wodt.
Mien laive tied wat hevve wat over ons hin had dizze winter. Nou ja,winter….
Reality tillevisie, make-overs, correcties van verolderde lichoamen, shows mit dooie lichoamen, ik wait t nait aal.
De verloedering van onze moatschappij gait gestoag deur, de geslachtsdailen vlogen as culinaire hapjes deur t beeld van de flatscreen en as ze nait aan t waark waren, waren ze wel in de revisie.
Goorlapperij alom. De aine viespeuk noa de aandere idioot verscheen op de tillevisie en etaleerde de ain of aandere vorm van potloodventerij en gefrustreerdhaid en t aargste is, wie keken der noar. Mit zien allen.
Ik ook hur.
Ik kin wel zeggen dat ik zat te zappen mor den laig k da’k barst.
K Heb noar minsen zitten te kieken da’k bie miezulf dochde:
“ Vissering mienjong doe krigst nait ales meer mit”.
As dit de nörm wodt bin ik baange dat ik hier en doar de boot mis.
Ik betrap miezulf derop da’k n conservatieve olle kiddel wor en dat ik het nog best vind ook.
Oaf en tou kom ik , netuurlek zappend van 1 noar 24, MAX tegen.
n Station veur de 50 plussers woar grieze mannen en rooie vrouwen heur opwachten moaken.
De Jos Brinken, Freek de Jonges, Ramses Shaffy’s en Mireille Bekooys vullen dit informatief programma en proaten wat over vrouger en wat of ze nou doun.
Oaf en tou is der n taboedeurbrekend onderwaarp mor ze duren nait te gek te moaken en dat huift ook nait in zo’n show.
Integriteit en respect veur de minsen doar gait t aigenlieks allemoal om.
Dat vind ik gelukkig bie de publieken en ik huif gain opsomming van de programma’s dij ik bedoul te moaken.

Noa n oavendje cultuur, actualiteit en nijs zap ik ales nog eem bielaangs en kom per ongeluk midden in spuiten en slikken terecht.
Jongeluu proaten of sex, drugs en kopzere en mit blouddeurlopen ogen en felrooie blosjes op mien waangen zit ik inains tuzzen weerdevolle hulpmiddeln, piltjederij en tovertabak.
Zulfs Philemon vaalt stil. t Wodt tied om op bêrre te goan.

De mooiste live oetzenden was oafgelopen weke bie mie achterthoes.
n Poartje winterkoninkjes hebben n nussie in krans aan mien schure moakt en t mannechie haar t wiefie n kedootje mitnomen. n Veertje.
Hai dee de baltsvlucht veur ons ogen, zong zo mooi en sloofde zok zo oet bie t verovern van zien prinsessie….
n Wondertje op anderhaalf meter oafstand. Vief gram pure laifde….
David Attenborough gaf nog net gain commentaar.

zondag, april 01, 2007

Noordmannen (Visserings Visie)

Beste keunegin,

Stommegeern wil ik sollicitaaiern noar de funktie van joen commesoares in de pervincie Grunnen.
Ik bin ain jong belegen muskus en beverröttenvanger en heb roeme ervoaren in het bewaarken van mins en daar.
Het lidmoatschop van n politieke partij is mie nait gunt omreden dat ik as laidjesmoaker de kop leeg hoalen mout en doarum onder of boven de politiek stoan wil.
Mien sympathie ligt meer bie de minsen dij het doun mouten bedoul ik te zeggen.
Ik kin kört van stof wezen en dat het zien veurdailen den weer tiedens het vergoadern in de Stoatenzoal.

Ik kin aine mit de ogen terechte wiezen en dat liekt mie sums wel neudeg omreden dat nut en noodzoak van summege plazerij wied vot is en doarum der aine wezen mout dij de go of non go van n gesprek of gloepense laange monoloog hier en doar n leutje beetje wait te minimaliseern noar de items woar t essentieel om gait.
Wie hebben niks aan luu dij nog nooit n strenge liek mokt hebben en dij schuren laangs hun aigen woarhaid en de echte woarhaid, wie willen bie ons in Grunnen groag doames en heren van J de W.

Grunnen gait mie aan t haart en wel aan Grunnen komt, komt aan mie.
k Wait nait of k wel genog begoage in mien rugzakkie heb en doarum heb k bedocht, majesteit, dat joe mie tiedens t sollicitoatiegesprek testen op mien intelligentie. Op geschiedenis, kennis van de netuur, humor, relativeringsvermogen en algemaine kennis.
Geschiedenis vond k aaltied mooi, zo wait ik nog dat in 1584 joen veurvoader Willem de Zwieger is vermoord.
De geschiedenis noa 2002 interesseert mie wat minder as je nait t aarg vinden.
Der is zoveul gebeurt, dat de gedachtengaang van hail veul minsen,zo liekt het wel, aantast is.
Ales wat dij verschrikkelijke Janmaat n joar of tiene leden zee is nou mild en doar kin ik as Grunneger pladdelander slecht aan winnen.
As grode laifhebber van Lucky Luke wil ik groag in hail Nederland de invoering van pek met veren introdusaaiern.
Het liekt mie geweldig om ain mit blaikwotter geblondeerde man mit pek en veren op n bongel vastbonden de grens over te zetten.
k Bin ook laifhebber van Asterix en Obelix mor om n onverloat mit verödde vis
te bewaarken, te roupen: “Je fuster ful je bedoelen”, gait mie te wied.
Wie binnen per slot van reken n democratie, gelukkeg mor.
K Hoop dat joe mie nuigen veur n gesprek enne….
Der gait niks boven Grunnen behaalve Röttemeroog en Ploat.
O ja, vergeetn te zeggen, k heb wel twij paspoorten….