Noordmannen/VisseringsVisie/Ter Apel

Het leven in de middelaiwen sprekt mie op de ain of aandere menaar wel aan. Luu binnen mit primaire dingen zoas eetn en drinken bezig en de luxe woarin wie ons as verwende nijmoodse minshaid bezeghôllen haar t volk van 1531 totoal nog gain wait van. Klaid in zeehondenbont en vellen van allerhande baisten gingen kiddels op jacht en vraauwluu muiken t eetn kloar, neem ik aan. Biegeleuf en hekserij wazzen gewoon en as t nait om liek wost wuirst varendaild of gewoon verbraand. Veur doemdenkerij, roddel en achterklap en aander gesnak haar t volkje van joagers, boeren en passanten gain tied. Der mos eetn op toafel kommen, speerpunten veur de pieleenboge moakt wodden en holt veur t vuur mos der kommen. Veul holt omreden t wuir n kolle nacht. De goden moggen nait kwoad wodden , doarum offerden de stam ook nog n stuk of vief Zuud Grunneger Leghorns aan Thor en Wodan, Waren ze rusteg. Chagarijnen. Aaltied gezeur mit dij godjederij. T Klooster haar boudel goud onder controle en ast mor de schien haar van ongeleufeghaid of zeest n vies woord was de toorn van ons Laimeneer nait te overzain en spraken de monniken schaande over die en dat wost ja nait. Gain gedonder in de gloazen.
Troubadours en raaizegers brachten t nijs van dörp noar dörp en de bards bezongen de schoonhaid van de wichter en de gevuileghaiden van dij tied. Slaauwe verkopers en aander raisvolk verkochten proatjes en lokkepoemel. Ze bedrogen de minsen woar ze biestonden.
Zaalfies en goar stinkende wottertjes wuiren as waarme broodjes verkocht. As t schurft, syfilis of aandere jeukerij haarst streekst t spultje op t zere stee, namst n poar liter bier tot die en bleefst n dag in t heu liggen in oafwachten van n wonder dij zok voak n poar uur loater aandainde as de man mit de hoamer, kopzere dus. T Leven was best goud. Vlaigen kon nog nait en van thoeszörge haren ze nog nooit heurd. Neukjederij, pardon, t deurgeven van de genen bepaarkte zok tot wat onhandeg gefriemel onder n schoapewollen deken in t duuster van de nacht. Woarschienlek het de pastoor of de monnik van dainst hier zulf ook oaf en tou n dankboare rol in vervult.
De maiste luu stonden der versteld van as der noa n moand of negen weer n potje geboren wuir. Gain babycare onzin of rose en blaauwe geneuzel, nee, Gerbrand of Brunhilde kwam aan tidde te liggen en de netuur dee wieder zien waark zoas de netuur dat honderddoezenden, ik zeg miljounen joaren aal dee. Ast geluk haarst wuir t kind groot en mit pech ging e dood en was der n joar loater de herkansing. Gain gedou wieder. Aandailen, Obligoaties en hydraterende crème mos nog oetvonden worden. Criminelen en graaiers haren gain stropdazen veur mor waren eerliekse boeven mit n gore rötkop en n littaiken op de waange. Zai lagen in roegte en stroeken en sluigen die op de kop zoas dat in dij tied heurde. Eerlieks en oprecht. Roezie wuir mit oorlogen man tegen man oetvochten en as zai de pest op die in haren wuirst ophongen. Maarten Luther was in dizze tied drok dounde de boudel te reformeren. As hai der vandoage achterkwam dat de paus n Duutser was en ‘Bedaankt veur die Blumen oit Nederland ‘zee, en de biebel in t Grunnegers vertoalt is draaide hai zok nou in zien graf om. Visionairs oet dij tied konden nait veurzain dat n leutje 500 joar loater t leven n grode wedstried wodden zel. Bedörven deur aarmzoalege tillevisie programmoa’s en zaike gaisten wodt de homo sapiens anno 2008 bedraigd deur reality shows en voetbal analisten. Olders roaken in paniek as de juf n dag schooltjezaik is. De dattegers mit kleuters en peuters verneuken de belasting mit kinderopvang en kilometers terwiel dat de vutters en aandere bejoarden in Nederland blieven omdat de diesel zo duur is.
In 1531 luipen ze tenminste nog. Swaade kraaien haren dou nog status en de keurslager was, zulf mit n speer t veld in om n everzwien te scoren. Der was wel ain noadail in dij tied…..
Der waren gain mobiele tillefoons……

Noordmannen/VisseringsVisie/ Oldekerk

Nyons ligt op de grìns van t Rhonedal en de Provence in Zuud Frankriek. Wie binnen nou n weke onderwegens en roaken nait oetkeken. De catacomben van de camper vullen zok langzoamerhaand mit streekproducten variërend van rooie en widde wien, lavendel eullie tot en mit stinkende sikkekeze en lokoale knoflookworst. t Stadje woar wie nou binnen is t centrum van de Franse olieven.
Oliefeulie oet Nyons is wereldberoemd en ales in dit op de rotsen gebaauwde stadje stati in het taiken van olieven. Ik kiek vanachter mien laptop noar de mooiste oliefbomen en luu hebben hier noast veul bloumen en palmbomen, oliefbomen in toene. Kommende dunderdag is hier de dag van de olieven. Mörn rieden we richting Privas over Montemillar. Nogat komt doar vot. Elk stee, elk gedailte van dit grode laand het zien bekoring. n. Franssoos huift nooit noar n vrumd laand omreden zai hebben ales zulf. Zee, baargen, bossen, cultuurhistorie en n grode passie veur eetn en drinken.
Meloenen smoaken hier noar meloenen en perziken zoegst zo sikkom mit pidde en aal noar binnen. De zunne dut zien waark hier goud.
Tuzzen twoalf en twije trekken ze de stekkers der oet en in de noamiddag komt de boudel weer op gang. De Nederlandse tourist is n grode en dakboare bron van inkomsten en zo heb ik mie ook loaten verlaiden tot de aankoop van n flezze biologische oliefeulie van € 21,80 en nog n flezze van bienoa € 18,00.
Oliefbomen binnen duur. In Nederland heb ik op internet aal eem rondkeken en n echte olle boom kost n poar doezend euro’s. Is mie te duur. In mien gedachten zai ik de eerste oliefbomen-plantage van Nederland ontstoan. In de Sellingerbeetse wel te verstoan. n Bundertje of vare prachtege boompies op aarme grond. n Poar boeren pakken t op en Westerwolde het wat nijs onder de zunne. Oliefeulie en tapenoade oet de Beetse. t Zol wel bie dagdreumen blieven.
t Is netuurlek zo, dat hier ter plekke ales lekkerder liekt en lekkerder smoakt. n Vissie in Termunterziel smoakt 10 keer zo mooi as n zolte hering oet de bossen ven Exloo, zo is dat ain keer. De lucht in de koelkaaste van mien camper is in Nederland n woar milieudelict terwiel der allenneg mor wat Franse sikkekezies in liggen. Dat de boudel nog nait ontploft is mag n wonder haiten.
Tröts is denk ik het juuste woord woar ik noar zuik. Luu binnen hier in Frankriek wies mit heur boeren en producteurs dij t eten moaken en verbaauwen. Kinnen wie nog wat van leren. Het goddeleke stokbrood, het jentege baquetje of de ‘one and only’croissant, t heurt in La France bie t doageliekse leven. Het is in Frankriek wettelek verplicht dat in elk dörp n waarme bakker mot zitten, ik bedoul mor.
Der is veul om over noa te denken in de vakanzie. Veul te bekieken. Minsen te bekieken, observeren. Prachtege maarkies mit de lokale bewoners en vakanziegangers. Mor ook maarkies mit n hoog vakanziekaraokegehalte en zulfbedochte nepfolklore. Mooi om te zain. Ik kin aan de raande van zo’n spektoakel aaltied moateloos genieten van verschaidenhaid van ons minsen. En wat mie in t zunnege Zuud Frankriek en in de gruine baargen van de Jura nog het maiste opvaalt? Juust......! Roare jonges dij Nederlanders.