Noordmannen/VisseringsVisie/Uithuizermeden

Kinnen joe het fenomeen ´Lopend buffet’?Doar wil ik het dizze keer mit joe over hebben. Het bestaait aal joaren.Eetn en drinken tiedens n lopend buffet, veur luu dij nait waiten wat t is, t is nait stoer, je goan noar n restaurant of n aander horeca etablissement en je mouten joen eten zulf opscheppen en op stee brengen. T Wodt nait deur de ober serveert mor je goan bie de diverse hapjes en drankies laangs en nemen net zoveul asdat je zulf willen. Mien eerste ervoaren stamt alweer oet de joaren tachteg. Ik speulde in dij joaren in n grode top vatteg band en wie wuiren deur Henny van der Most van de Bonte Wever in Slagharen inhuurt om tiedens, poaske, pinkstern en de kerst het ‘warm en koud buffet met dansen van toporkest’ de boudel muzikoal te vermoaken.
As de deuren van de prachtege blaauwe balzoal open gingen stonden wie doar in widde smoking mit vlinder veur te speulen. Op de zuitgevoisde klaanken van trompetmeziek mossen de minsen tiedens heur culinaire hoogtepunt van t joar dit moment van intens gelok nooit weer vergeten. De entourage,de romantiek de vrundeleke gezichten van de topmuzikaanten alles leek de hemel op eerde….. totdat de deuren opengingen…..
Wie stonden gelokkeg op n podium aanders waren wie te pletter lopen. Nederland kwam binnen stuitern en ze wazzen op de vlucht veur de zundvlout of ze wazzen oetsturven van de honger.
Binnen de korste keren stond der n riege van n klaaine viefhonderd man de petatbakken en huzarensalades leeg te scheppen, t personeel van de Bonte Wever haar t zwait veur de kop stoan en kon der nait tegen aanslepen. De prachtege zoal leek meer op n gymnastieklokoal tiedens overstromingsramp in de veurmoalege DDR.
Kinder begonnen te jaanken, moetjes te schelden en n stuk of wat pubers wazzen de iesbar aan t slopen en de slagroomspoide wuir leegspoten op n poar kleuters mit snot op de libbe.
Ons meziek kost in t lewaai nait meer heuren en iedere keer as wie wat haarder begonnen te speulen , begonnen de minsen haarder te proaten of te roupen.
Dit deden wie twij keer per dag, zes moal in n weekend mit de feestdoagen.
Ik duur rusteg te zeggen dat ik wel wat wind bin.
Mor as ik noa n zeer moatege moaltied in old drents buffetrestaurant in n balkenveurtzicht sfeer n flezze douchgel as kedootje krieg brekt mie de klombe.
Ik bin in n vreettinde om te vreetn ook ast nait te vreetn is en nait om douchegel te kriegen!
Stink ik sums? Roek ik onder d aarms? Is dit n hint van de ober?Douchegel pour hommes!
En veur de wichter, douchegel pour elle. Goudkobe troep!
As je der wat Gouds mit doun willen moak joen plee der den mit schoon of stop t op n mooi donker plekkie woar gain schilderijen hangen.
En wat buffetten betreft, der is mor ain goud buffet, buffet crampon.
En dat is n saxofoon……

Noordmannen/VisseringsVisie/Dollard

k Heb net n olle haals op marktplaats.nl kocht. Gain nekke mor n haals.
Nait zo’n haalsie van zet ’m op de romp mor n haals van n Telecaster.
N Telecaster is n gitaar en gain lichoamsdail, mor dat begriepen joe wol en dit gedailte van de gitaar is aarg belangriek.
Zunder haals gain meziek.
De haals is dat laange stuk woar de romp, de body aan vast zit, bie de mins wodt dat biemekoar holden deur n ruggegroat en bie gitaren monteerd mit schroeven of liem.

De Telecaster en de Stratocaster binnen gitaarmodellen oet de viefteger joaren van de veurege aiw en ontwörpen deur Leo Fender.
Fender gitaren binnen wereldberoemd.
Ale muzikaten op de haile wereld speulen op Fender.
Der binnen ook tientallen aandere maarken en soorten mor ik bin n laifhebber van de Telecaster.
Zai liekt n beetje op n roeispoane mor is zo mooi en rond dat k der aaltied mor weer n brok van in mien strödde krieg.
Ik heb der nou drije van mor ik hoop binnenkört de Thinline, de Luxe, de Custom en B- Bender te scoren.
De Telecaster wodt deur ons kenners de Tele nuimt.
Over de Tele, en Tele schrief je mit n hoofdletter, wodden gain grappies mokt!
Lest muik aine n touspeulen op de teletubbies.
Dizze persoon is mit n muskusröddeklemme op zien snoede opnomen in t zaikenhoes.
Gain gedonder over de Tele….
Aan mien muren hangen ook Höfner gitaren.
Der is der zulfs aine bie mit dezulfde leeftied as zien boas.
Dizze wonderschone 4550 archtop mit cutaway is van 1955, ook n goud wienjoar volgens de vinoloog, liekt in t gehail nait op de Telecasters van Fender mor ook veur dizze prachtege instrumenten heb ik n zwak.
Paul McCartney speulde o.a. op n Höfner vioolbas.

Gitaren binnen mooie dingen.
Ze binnen van grode schoonhaid en kist der meziek op moaken.
De vörmgeven en de onlogische manaar van zes snoaren onder mekoar, het onberiekboare veur aine dij der nait op kin speulen, n gitaar het t aigenlieks aalmoal in zok.
Kist der zulfs bloaren van kriegen.
O Ja, n gitaar is aaltied vrouwelek.
Nait om heur ronde vörms mor gewoon….
En in mien dreadnought Martin gitaar zit n gat….

Noordmannen/VisseringsVisie/Kiel Windeweer

Sums lieken minsen op dingen.
Ik mag terploatse in schietbulde zakken, vandeweke zag k anorexieachtig vrouwminsk op n fietse van Nederlandse moakelij dij mie staark aan n de Eifeltoren in Paris denken dee.
Zai haar roare puntmutse op de kop, n metoalkleurege jaze aan en heur bainen leken op de stoanders van dizze o zo bekende toren.
Roar hè? Dit was n peervörmege aangelegenhaid.
k Zag lest n potje mit n ontzettende proelkop dij op zo’n hond, n Mastiff leek.
Veul valen in d hoed en de rimpels waren deur t gereer en gejaank van de stumper extroa oetzet leek wel.
t Aarme babietje kwielde ales deronder en haar woarschienlek n zaikte onder de leden of t haar honger en was muide.
Toch is n potje mit hondekop gain zeldzoamhaid hûr.
De maiste leutje kinder binnen natuurlek ploatjes om te zain mor lest in de supermaarkt zag n grom dij verduveld veul op doberman pincer leek.
Dizze onsympathieke honderas was hom tot de kop oetsneden.
Plietsies en plietsievrauwen lieken deur de grode petten en belacheleke houdjes op komische pipo’s en mammaloes bekend van de olle tillevisie series en grappege films oet de tied dat ze poep nog mit de laange oe schreven.
Petten , stropdazen en houdjes mit ronde kaanten binnen olderwets en ik vind dat as je de heren en doames van de wet weer wat oetstoaling willen geven, je dizze items rituail mouten verbraanden.
Vot mit de plietsieheufddeksels.
Casueel is t antwoord. Vlodde klaier mit vleugje nonchalance geft onze beschaarmheer en doame weer n moderne oetkiek.
De tied van de swaade kraaie is veurbie.
Ik leuf ik wiek wat oaf….
Tot mien grode schrik bin k zulf ook slachtoffer van wat oeterleke minpuntjes.
Keek guster vanommedag in de spaigel en schrok mie de pleures.
In t verleden bin ik in diverse stoaten dit badkoamer accessoire passeert en kwam tot de conclusie dat k noarmoate de omstandegheden ik der ook aanders oetzai.
k Leek op n opgevalen kraande, ingetrapte emmer, n overgeef teiltje en op n lekke visboot.
En t aargste van alles is, t blieft stoer om dit van joezulf te zeggen.
T Levend of beter zegd de leeftied begunt zien tol te aaisen.
En as je van minsen kieken hôllen goan je der ook op letten.
Nait om t ain of t aander, minsen oafzeiken het gain zin mor om de plussen en minnen mit mekoar te vergeleieken is mooi.
Minsen binnen mooi. Minsen binnen geweldeg!
k Kwam net n prachteg opvalend meerkleureg mit veul jewailen behaangen extravert grof vrouwmins tegen.
Zai leek op autoscooters.
Mooi man.

Noordmannen/VisseringsVisie/Opende

Cultuur het t zwoar te verduren.
Minsen binnen interesseert in ales behaalve de muze, de schone kunstmoakerij van de creatieve gaisten onder ons.
Cultuur is sikkom n scheldwoord mit n hoge koale kak gehalte en luu dij doar achteraan lopen binnen de elitaire HBO ers en t geitewollensokken bataljon van vrouger.

Bie concerten en aandere kunstzinnege oetspattens zugst stainvast dezulfde koppen en t is veur veul luu n menaar om te kieken en om zain te wodden.
De NRC en de Vrij Nederland lezer kist nog aanpeerdjen om n mooie expositie te bezuiken of om de haanden op mekoar te kriegen veur schiere opera, schilderij of klassiek concert. Schilders kinnen van honger de deurklinke nait vinden, zangeressen waarken as serveerster en laidjesmoakers binnen de loosers van de nije tied.
Cultuur is sikkom doodsturven….
Vrouger op de legere schoule wuiren wie hoast dwongen om schoolconcerten te bezuiken. k Vond t stiekem mooi mor dat zee k natuurlijk nait.
t Was nait “cool” , om dat mooi te vinden en benoam de Rolling Stones en Bob Dylan wazzen gain veurbeelden van hoogstoande cultuur in dij tied.
Nou wel.
De Stones binnen haaileg en Bob Dylan is n God en terecht.
De prachtige regel van ain gedicht van Godfried Bomans speult mie nog deur de kop: Ik wou dat ik twee hondjes was dan kon ik samen spelen , ik zit me voor het raam stierlijk te vervelen. Of dizze….
n Klaain beetje interesse van wat der gruit en bluit in letterleke en figuurleke zin is der nait meer bie.
Het dit te moaken mit leeftied en conservatisme?
Nijmoodse cultuur binnen de i-Pod, de mobiele tillefoon en het fenomeen Piroatenfestival.
Makkeleke deur de harsens opneemboare massa prutjederij mit n sausie der overhin dij wie allemoal lekker vinden.
Nait te zoer en nait te zuit.

De Nederlandse toal verloedert en wodt ploagt deur oafkörtingen, Pink Pop is n herhoalen van de zesteger joaren en op de flatscreen is het nait meer : Lekker op berre en mörn gezond weerop, nee, de make overs, blode titten en de John de Mollaria troep verzaiken ons leven.
De riedende rechter het t drok mit aarfschaidens en kutconiferen.
Nederland leeft!
Componisten as Bach en Mozart binnen vergeten en mooie woorden as Lets spent a night together en I see a red door and I want to paint it black en to be or not to be binnen verdrongen deur: Heb je even voor mij en Meitie, meitie, meitie ben je n bokkie of n geitie.
Doarum beste luusteroars en kunstminnoars plait ik veur hedendoagse kunst op de voetbalshirts, scheidsrechters in tutu en gain commentoar, nee, klassieke muziek tiedens de voetbalwedstrieden op de tillevisie.