Noordmannen/VisseringsVisie/Sellingen

Op de raande van t zwembad van camping “ Rochecondrie” in Viviers, de Ardeche speulen zok interssante taferelen oaf.
n Ploug dattegers mit kinder oet Nederland hebben ale vief stoacarrevans huurt.
Der staon mie n partij leasebakken, maxicosi’s, dakkoffers en notebooks….. en om de menuut heurst de nijste ringtones, veur de rest liekt ales in vrede en harmonie te verlopen. t Is ja vekanzie ja.
De voaders goan om n uur of tiene veuroet om rond t zwembad kamp te moaken.
Zai slepen ale haardplestieken baanken en stoulen noar t kinderbadje, perbaren mit ingeholden buken en stoense blikken indruk op de aandere gasten te moaken en wachten mit de buit op de mouders en kindertjes dij laachend en kirrend aan kommen lopen om de piscine veur de rest van de dag in te nemen.
t Is net n recloamespotje. Gelukkege gezinnen! Leven as God in Frankriek.
Der wodt proat en giegelt, allemoal binnen ze zo vrolek as wat. De eerste biertjes en wientjes wodden opentrokken en ain van de papa’s begunt aal kunsies te vertonen totdat Pascal, n leutje kiddeltje mit n pampers Billy veur, veurover in t kinderbadje vaalt.
Dit ongelukkie is er de aanlaiden veur dat de voader van stoacarrevan twije de laiden van dizze stam op zok nemt en Pascal mit grotesk geboar aan zien bezörgde moetje overhaandegd. Wieder niks loos.
De voaders begeven zok te wotter en de kindertjes dij voaderlaif t haile joar sikkom zain hebben wodden drilt tot geheurzoame soldoatjes.
“Mirte, Naomi en Kevin! Naar papa kijken, nu! Kevin! Kijken! “
De klootviool begonia springt mit soort bommegie in t wotter. De kids kieken allaank d aander kaande op as Peppi weer boven komt.
Hai het in de goaten dat der wat aander luu zitten te kieken en zugt dat hai n nederloagie leden het.
“Mirte en Naomi, papa gaat nu een salto doen die ik vroeger altijd met oom Piet deed. Goed kijken….Miwwwwte! Kevin jij ook!”
Op de lege duukplaanke dij tiedens de drokte slootn is nemt de hoogstwoarschienleke sales accountant dij wind is om te scoren en totoal gain invloud op zien opgruiende kroost het n aanloop en n spastische duuk in t lekkere wotter van Camping Rochecondrie. t Net geschaaiden moudertje van nummer vare zugt zien heldendoad en knipoogt noar hom. Zien aigen vraauwe het dit deur, mit n proellekop begunt zai hom mit wit spul in te smeren en doarnoa spontoan te jaanken as Pascal mit de pamper veur veur de twijde moal veurover in t badje flikkert en der bloud aan zien lippie zit.
Zai winst heur kiddel ales tou en verdwient overdreven overstuur mit bebloud kind op d aarm noar de carrevan.
n Libelleachtege discussie brekt lös. Het kampement is in twij partijen verdaild.
Ik zit onder de plataan aan de raande van t zwembad en dou net of ik lees.
t Is vekanzie. t Leven is cabaret. Ik bin n groot cabaret laifhebber.

Noordmannen/VisseringsVisie/Veendam

In de collegezoal van de Universiteit veur de Gitaar Waitenschop zitten Chat Atkins, Harm Haandrikman, Daniel Lohues, Douwe Strerkenburg, Adrian Farmer, Jan de Vrieze, Harrie Niehof ain poar veur mie onbekende gitaristen en ik zee de gek aandachteg te luustern noar n akoestische gitaar professor mit n voag gezicht en n onoetsprekeleke noam.
Vakjargon zoas “solid top”, “rosewood”, en “triple OOO” vlaigen ons om de oren en gainaine duurft de meester te onderbreken.
De aanders zo adrem reageernde gitaristen pazen wel op.
n Prachtege les over heur geraidschop, heur raiwe, loaten zai nait aan zok veurbie goan.
“Dus gentlemen, the sound of the instrument ligt aan t holtsoort dij gebruukt is en aan t aantal joarringen van de spruce top.
Zoas ik aal eerder zee is spruce, dennenholt, de haardhaid en de ploats woar dizze boom stoan het belangriek veur de klankkleur van dien instrument.
As n stoomwals gait de voage hoogleroar in de gitaarwaitenschop deur de stof.
Automoatisch analyseert hai de gitaar van top tot tone.
Het prachtege woord mahogeny, mahonie komt voak veur.
De vörm van gitaar is allineg goud veur n reloas van sikkom n haalf uur.
De archtop wint t dudelk van de cutaway, dreadnought van de jumbo en zo inains zitn we in de braces.
De braces binnen de dunne holten latjes aan de binnenkaande van de gitaar dij verantwoordelek binnen veur de klank.
N Klank kin kört of laank, waarm of kold, rond en neuseg, aigenlieks kin n klank ales wezen.
De braces in mien Martin gitaar vörmen n soort kruus en geven doarum n waarme heldere klank in mien D41.
Inains zegt de professor: “Wie nuimen de braces ook wel zanglatjes”.
“Jezusmina, denk ik, “Natuurlek, zanglatjes”.
In gedachten verzopen zai ik overal zanglatjes.
Achter mien hoes hangen 2 gitaren as vogelhoeske.Stel die veur, mit n poar weke binnen meneer ven mevrouw keudeldoemke of blaauwmaiske op zuik noar onderkommen veur de 2e leg, kommen ze bie mien gitaren en zeggen tegen mekoar: “Wie nemen hom”.
Zollen dij vogeltjes dank zij de zanglatjes den ook mooier zingen?
Let wel.N Keudeldoemke, n winterkoning van n poar gram zingt verholdingsgewies zo haard dat bie ons vergeleken n zanger 130 moal zo groot zol wezen.
As den deur aal dat gezang van dij vogels in mien design vogelhoeskes ook nog t geluud verstaarkt zol wodden deur de zanglatjes, den heb ik n groot geluudsoverlast probleem.
Ik denk dat nou mor wakker wor…..

Noordmannen/VisseringsVisie/Eenrum

Baargen binnen hartstikke mooi as joe der van hôllen.
Het mooie van de zee is, dat der gain baargen binnen.
Ik heb het veurrecht om oaf en tou ons laand te bekieken vanoet n aander perspectief.
Vanoaf de zee, de Waddenzee. n Prachteg gezicht Grunnen over t wotter.
Röttemerploat, Röttemeroog, Börkum, Schier…..
Hest inains n hail aandere kiek op de aailaanden.
Kiekst noar dien voaderlaand vanoaf n boot. Noar wotter tot de horizon en wieder niks. Gain gebaauwen van cultuurhistorische weerde, gain bomen, en veural gain pretpaarken woar de luu zok tot sloetenstied vermoaken.
Minsen dij noar de aailaanden goan binnen over t algemain aandere types as de pretpaarklaifhebbers.
Zai binnen hoger opgelaaid, de Greenpeace en Live earth types, de vutter dij zien schoapen op t dreuge het en kiddels dij mit de twijde leg bezig binnen.
Veural de leste groep nemt volgens de horeca schrikboarend tou.
Manluu van boven de viefteg mit n schiere jonge deerne van begun datteg en n den wel rose of blaauw gekleurd potje verschienen regelmoateg op Schiermonnikoog en de aandere aailaanden. t Begunt sikkom n ploag te wodden. Bejoarde pa’s en jonge moetjes kommen bepakt mit n kuub pampers boy of girl t aailaand verovern
De bolderkaren dendern over de Strandweg en de fietspoaden roaken verstopt mit gelukkege gezinnen.
De vegetarische burgers binnen nait aan te slepen en de trilbaanken van de ploatseleke sportschool draaien overuren. De noagel annex beautyshop kin de nachtcreme van Oilily nait aanslepen en paps kriegt bienoa elke dag n geurtje omdat hai op zien leeftied toch wat noar old zwait begunt te stinken.
O ja, de snorre is deroaf, netuurlek.
Mit n grode veraandering as n schaiden, n nije reloatie en n laifdesbaby heurt ook n nij image , dus, vot mit dij snorre.
T Is mie wat. De aailaanden roaken overvol mit dizze nije doulgroep.
Texel en Vlielaand verzakken, Terschelling wil n paringsstop en Ameland en Schier binnen nog in overleg.
De leste geruchten binnen, dat zai de dieken ophogen willen mit gebruukte pampers om zo t bruiikaseffect en t twijdelegsyndroon veur te blieven.
Spreuken zoas: “Noa dizze n vrizze” en “Noa dije n nije” en ‘Derop of gain vreetn” binnen sunt 1 juli verboden op alle aailaanden.
K Bin zulf regelmoateg op Röttemeroog west.
Vogels tellen, foto’s moaken, de haarde schieve resetten, joe kinnen dat wel.
Zolt nait wat wezen om hier n kuuroord veur olders mit leutje kinder te baauwen?n Lustoord veur t gezin. Er gaat niets boven Groningen behalve gezinshotel “Rottum” met kindercrash en therapeutische ruimten voor hem en haar.
Koeknuffeltherapie en snelcursus garnalenpulen.
Neeee…… Doun we nait.
Loat ze mor noar Schiermonnikoog goan.
Doar is t ook schier.

Noordmannen/VisseringsVisie/Pieterburen

Roare dingen dij mannen. Wie boeren, loaten scheten, snieden t vlees, kraben aan ons kont, snakken, willen geliek hebben, nemen veurrang enz., enz.
n Man is en blieft n joager. Vrouger gingen wie op jacht, vergokten wie de zege en de vrauwluu en scheurden wie der n schier levend van oaf.
Van aal dij oerinstinkten binnen nait veul meer over, alhouwel, ik pis nog aal tegen n boom, t laist ekkelboom van over de honderd joar om mien territorium oaf te boaken. Mor dat schient tegenwoordeg wildplassen te haiten.
Wie kiddels moaken testosteron aan, n stoffie dij ons onze mannelekhaid geft en der veur zörgt dat ales zo waarkt zoast waarken mout.
Elke man produceert dit spul. De ain wat meer as de aander. Vraauwlu hebben t ook mor veul minder.
As je genog testosteron in joe hebben kist der zulfs wedstrieden mit winnen.
En deur dit spul doun wie zo kiddelachteg, dat is de reden.
Biologie laive luustervinken, t is puur biologie.
Door mouder natuur gedroagen wie ons zo.
Mannen binnen joagers! Mannen willen macht! En…. wie willen n aigen keuninkriek.
En dij heb wie! In de hiërarchische structuren van onze moatschappij binnen der keuninkriekjes in ale geuren en kleuren.
Tiedens het boodschoppen doun mag de man, dij t karrechie deur de supermaarkt schoeft bie de slager t vlees veur de haile weke oetzuiken. En de man riedt. Aaltied! Der komt gainaine achter t stuur van de auto, t domein van de man.
Behaalve as e de piepen vol het op t joarliekse hoogtepunt, t personeelsfeessie bie het buffetrestaurant in Odoorn, te Drentië.
Den mag de vraauwe rieden, netuurlek onder laiden van…. mien man!
In t wel en wee van het doagelieks bestoan binnen der talloze items te bedinken woar oaf de man, de joager de boventoon wil voeren.
Kiek noar de boas. Zai hou hai des heren wegen bewandelt om orde, nethaid en zulfbevredeging in zien leven aan te brengen.
Van Jan Peter chef van Nederlaand tot en mit de bedriefslaider van de ploatseleke supermaarkt, allemoal voaren wie mannen op het bootje dat testosteron hait.
Dit geslachtshormoon is verantwoordelek veur t railen en zailen van onze eerdkloot. Het vörmt ons manluu tot charmante persoonlekhaiden, leuke drinkebruiers, verlichte despoten en linkmiegels dij vrund en vijand verneuken.
Wie moaken van ale zoogdaren t maiste van dit spul aan.
Testosteron is verantwoordelek veur de machocultuur,spierbalenkiekerij, kleerkaastebinkiegelul, hoar en koalhaid, boardgrui, spiermassa, spierkracht, n zwoar stemgeluud, hoantjesgedrag en nog veul meer.
Ik wor sums zo mui van dat gedou.
Geef mien testosteron mor aan Fikkie.
k Heb wel wat aanders te doun, de Tour is weer begonnen….

Noordmannen/VisseringsVisie/Tolbert

Het is sums stoer om die nait mit dingen te bemuien dij die nait aangoan en die aan situoaties te aargern woars ofst niks mit kist.
K Wol mie t laifst overaal mit bezighollen.
Bist onderweg, zugst inains wat, schudst mit de kop en denkst bie diezulf: “Wel zol dit verzonnen hebben of: “ Welke eikel bedenkt nou zowat?”
Nije auto’s heb ik dat o.a. mit.
Zugst n nij model rieden mit roare ronde vörms deraan en het bliekt zo’n futurischtische zinloze cabriolet te wezen.
n Mooi weer auto woar kiddels mit prostaat en aandere mid lifeachtege sores gebruuk van moaken. n Auto veur de flaauwekul en n bevestiging dat geld nait aaltied gelokkeg moakt.
t Gasunie gebaauw in Stad is oetroupen tot t mooiste gebaauw van Nederlaand. En terecht mor….
Ast vanoet t zuden Nederland binnenriedst zugst de lelekste en maist vrumde stainenbulten mit n ketoorfunktie aan de autoweg verschienen.
De biebeheurende kunstwaarken doun mien wenkbrauwen fronsen en stainen muurtjes in grappege vörmgeven verovern ons land van winkelcentrum tot jachthoaven. Wel is hier verantwoordelek veur?
Fantasieloze bagger. Nijmoodse kunstemoakerij. Verloedering van onze cultuur, dat vind ik het!
Der is veul onzin in de wereld.
Meschain aarger mie doar wel teveul aan, mor dat vind k mooi, wie mouten mekoar blieven prikkeln…
As aine zien auto wast as e smereg is kin ik dat begriepen mor aine dij elke weke n pot wax op zien haailege kou versmeert vind ik n roare man, n freak.
N Mooi hoes is geweldig mor zo’n hoes mit architectonische grappen en grollen in t ontwaarp kin k wel mooi vinden, mor nait hier in Tolbert of bie ons in Westerwolle.
Der is roemte genog in de Blaauwe Stad en in Meerstad veur dat soort excessen.
K Wait der zo nog wel n poar. Recloameborden laangs de weg, tillievisie programmoa’s, grode winkels as moezevale….
Der is elke dag wel wat.
Rie deur de eerste de beste nijbaauwbuurt of villawieke en elkenaine het twij grode voazen veur t roam stoan. In nouveau antique, quasi nonchalance of disign stoan ze in de vinsterbaanke. Wel het dat bedacht?
Is meneer Blokker of Leenbakker op n mooie mörn wakker wodden mit t idee om 670542 nederlanders twij voazen te verkopen? Wel riet hier aan de touwgies?
Wel zit hierachter?
George Bush, doames en heren. George Bush. meneer de president zulf luustert ales oaf. Hai is Big Brother. Hai is watching you.
Hai regelt mit Blokker, Balkenende, Ikea, Coca Cola en aandern, roare oetspattens woar ik geestelek over stroekel.
George Bush is veurzitter van de Wereldwiede Ciniferenbond.
Der is mor ain oplössen meugelk. Varendailen.
Opbraanden en veural gain stekkies van maoken….!