Noordmannen/VisseringsVisie/Meedhuizen

Mien trauma’s en complexen valen in vergelieken mit aandere minsen aigenlieks best wel mit. Ik heb gain slechte jeugd had,ik bin nait misbruukt en de snelkookpane van ons moe was aaltied goud vult, alhouwel stamppot knollen mie nou nog de stoepen op t lief joagen.
De geliekenis mit minsen dij t echt stoer had hebben wil ik hier den ook zeker nait moaken mor, ik heb der toch n poar.
In de eerste klasse van de legere school spijbelde ik al omreden de haile school was vrij behaalve wie en as zesjoarege vond ik dit onrecht, luip de school veurbie en ging noar n vriendje tou te speulen. Mien moe betrabde mie en s’oavends mos ik zunder eetn en op blode vouten op berre.
De juffrouw van de Hervormde Basisschool was aine van de olle stempel.
Ain vrijgezelle tante mit hoar op de koezen en drij laange hoaren op de pukkel op heur kinne. Ze kon gloepens vergreld over heur mit jampotbodems oetgevoerde brille hinkieken en as zai zag dastoe wat verkeerdst in heur ogen deedst sluig zai mit n linioaltje de knokkels van dien haand blaauw. t Was gewoon n rötwief, n kenau en n gefrusteerde hekse.
k Heb in 1976 de kaans had om heur dood te rieden mit mien besteleend mor dat vond k zunde van mien auto.
Oaf en tou wodt ik gillend wakker van dat mins dij inmiddels aal joaren nait meer onder ons is.
Mien twijde traumoatische ervoaren is oet dezulfde tied.
Op n Hervormde school mos je vrouger versies leren. Psaalms en Gezangen.
Ain moal in de weke op vrijdagmörn wuirst overheurt en as t nait tot de kop oet konst kreegst n onvoldounde.
Dit wuir mit n soort ingetogen sadisme op dien rapport vermeld en noast gedrag en vlijt vonden de meesters en juffen het tot de kop oet leren van christeleke liederen ain carrierebepoalend item omreden de moate woarofstoe het laidje opzeest kon wel ais belangriek wezen veur dien ploatse in de hemel of astder n potje van muikst dien stee in de hel. Mit t vingertje omhoog wuir de haile klasse chanteerd mit spreuken, one liners en bangmoakerij oet de noam van de voader, de zeun en de hailege gaist.
Mien antipathie veur geleuven, zweeftoustanden en andere goocheloarij is doar begonnen. De harsenspoulerij van onze leroaren is bie mie nait over kommen en ook op de middelboare Christeleke ULO betrapte ik voak meneren mit gore praktieken en vunzege gedachten.
De kadde wuir voak in het duuster knepen en der mog veural nait over proat wodden.
Mien aigen teksten kin k nait oet de kop omdat ze mie vrouger vernailt hebben mit:
De dorre vlakten der woestijnen zal zich verblijden eindeloos, de zandzee zal herschapen schijnen want bloeien zal zij als een roos. Gezang 111 achtervolgd mie as n schare in de nacht, mien haile leven al.
Wait n joe wat aangorden is? Ikke nait! Is het goarkoken? Het t mit görde te moaken?
Stait dit waarkwoord in de grode Van Dale? Gereed maken den mor, dat zol t wel wezen.
t Ainegste nummer wa’k tot de kop oet kin….
Gord u aan , Gord u aan, volk van God waarop gewacht?
Sla ineen de broederhanden, dring in s ‘Heren Jezus kracht
Op! Hij zelf bereidt voor u de baan, Gord u aan. Gord u aan.
Zoas ik al zee, mien trauma’s en complexen valen best wel mit.

Noordmannen/VisseringsVisie/Weite(Vlagtwedde)

De gruine woas wodt zichtboar in het landschop. t Veujoar staait op barsten.
Dizze oafgelopen weke stonk t boerenlaand. De Broabantse mestbaronnen sturen heur colonnes mit noar aceton stinkende kibbestront, t aaltied gezellig roekende zwienejirre en t olderwets meurende odeur van t sympatieke koiestront noar ons gebied tou.
Trucks mit grode tot de raand gevulde tanks drukken mie van de weg oaf om mit behulp van de GPS t goie stuk laand te vinden.
Zulvermeeuwen vlaigen massoal achter de injecteurs aan, baiten wodden zaait en eerdappels poot. De mooiste tied van t joar. De gruine sluier van nij joar wodt mit de dag staarker en der ontsproeten gain 15 of 100 bloadjes oet de takken, nee, miljounen, miljarden bloadjes in ale denkboare kleuren, van hail lichtgruin tot hartstikke donkergruin zain t daglicht in Prilmoand van 2008.
N Zweem van winst en nostalgie mokt zok van mie meester as ik in Veelerveen n boertje op n old Fergusontje t laand zai plougen en n leutje glimlach tovert zok om mien mond bie t zain van de eerste vole bie de peertjes in Wolgnhoezen.
Toentjekiddels hebben sloaplantjes al poot en de eerste riegen spinoazie kommen der deur. Niks gain plougen of trekkertjederij. Omgroaven mit n vurge is de boodschop. Aalgedureg eem n drup van neuse wrieven en stoef deurgoan omreden mörn mouten de vrougen derin. de Woudster en Irene’s stoan te kiemen in t stookhok in eerdappelkissies oet t joar nul van de veurege aiw.
De swaalfkebloumkes stoan massoal in potten en toentjes terwiel dat de tudeletoanen, salvia’s, fuchsia’s en geroaniums nog in de kas of de folder van t grootwinkelbedrief stoan. Eerst moederdag oafwachten, den maggen de ainjoaregen der pas in. Ik neurie de godganze weke al: Als de lente komt dan stuur ik jou tulpen uit Amsterdam en as ik de kieviten, kievit roupen heur, de swaalfkes over t wotter zai scheren en de muskusrötten mit tozzen gras in de bek noar heur hole zwemmen zai wait ik dat dizze tied de minsen vrolijke mokt. Weg mit dat gezeur, stoppen mit dat aiwege gejeuzel. Kiek in de spaigel, geef diezulf n beste schop onder de kont en goa van ommedag noar boeten. Lekker n endje lopen of fietsen deur Westerwolle, t Middag Humsterlaand of t Oldambt. Schudt dizze net gain winter van joe oaf en geniet van onze wereld zunder, oorlog, eerdbevens, rampen en lawines.
Verwinde sikken dij wie binnen, wie wonen in t rustegste dail van onze ruirege wereld, kloagen stain en bain, zoaniken over t waark, jammern over sinterij, lamenteern over de reloatie en weekloagen over consumptieve hikhakjederij en folders over verre raizen en overzeese bestemmingen. Wakker worden! Vergemie nog aan tou! Noar boeten rötkoppen, aan t zuurstof, zoeg de vrizze lucht in joen longen ! Griep de wandelschounen oet de wandelschounenkaaste en pomp de baanden van de fietse zo haard op dat ze net nait knappen.
Besef dat dit allemoal groatis is en besef ook dat mit n poar weke de asperges kloar binnen. Asperges, widde jonges oet t zaand van onze grond, lekker hur!
Het widde gold, t culinaire hoogtepunt van t joar komt der aan. Ik heb zin om mie te loaten rekruteren as aspergestekert op Westerwolle mor dat dou ik lekker nait. Ik eet ze wel op. Het veujoarextasemoment veur mie binnen asperges mit gesmolten botter, n medium gebakken beverrötten steak mit nije eerdappeltjes ook overspoult mit gesmolten knoflook botter. Hiep, hiep hoera veur t veujoar!
O ja, kiek oet veur motorclubjes en cabrio’s….

Noordmannen/VisseringsVisie/Froombosch

In Billund is t ooit begonnen. Billund ligt in Denemarken en dit dörp is bekend vanwege zien Legolaand. In 1988 of 1989 waren wie doar mit de kinder tiedens onze vekanzie en natuurlek mozzen wie noar t parredies van de blokkies, Legolaand.
De ingang was n soort foeke mit negen kassa’s woar honderden jonge gezinnen heur kinder in toom perbaarnden te hollen.
Wie ook. Onze zeun en onze dochter zagen Hans Christian Andersen ons aal toulaachen vanoet t paark. Doar is t begonnen. Mien allergie tegen riegen.
As n schoap in n rij stoan tuzzen jaankde grommen, in de riege tuzzen t pedagogisch gemurmel van paps en mams. As n stel haalve zolen stonden wie doar n haalf uur voutje veur voutje te schoeveln om den bie ain van de negen kassa’s in ain moal sikkom 2oo gulden lichter in ain soort Madurodam van taferelen en pretpaarkprodukten ons gelok te zuiken. Het Slagharen van Denemarken was veur mie n traumatische ervoaren en doar heb ik miezulf beloofd de rest van mien leven lange riegen en colonnes te vermieden.
As op de Sellingerstroade tuzzen Troapel en Selgn drij auto’s achter mekoar stilstoan neem ik n omweg of ik goa stiekom langs t maaipad van de sloot mien weg vervolgen.
Mit t bloudprikken in t zaikenhoes kom ik op n tiedstip dat der gainaine zit of ik koop de boudel om, om mor nait in de volte van de medemens en jeuzelkonten n nummertje te trekken en te zain dat mien nummer nog lang nait aan de beurt is.
De ainegste riege dij mien gemoud tot grode vreugde bringen kin is n reeks aaierbalen, vleeskroketten en frikandellen bie de petatboer of de overbekende mure in Stad. Vrouger op middelboare schoule was de volgorde van kaizen in t oapekooi team en het soamenstellen van het handbalelftal n crime in mien ogen.
De lange dunne sportieve type’s oet de Mussel haren dudelk de veurkeur boven de wat körtere, stevege middenstandkinders oet Muzzelknoal en doarum was mien funktie achter in de riege dije, variërend van reserve grensrechter tot daarde reserve theezetter. Proat mie der nait van.
Zulfs bie de militaire dainstkeuren ston ik achteraan en beloofde miezulf dat ze mie nait kregen. Noa twij moal n herkeuren in t Academisch was t kloar.
Volledeg ongeschikt. En dat bin ik ook, volledig ongeschikt om mit mien volle, haalve of gain verstaand in n rij van dingen achtermekoar in n bepoalde volgorde te verkeren woar mien klaaine harsencellen zo van opstipaaieren, reagaaieren en panikaaiern dat ik finoal inzak. Weg mit de riege! Alhouwel?
Wat mie dizze weke overkommen is, is hoast nait te leuven. Der muik zok n ainstemmeghaid van mie meester woar of k zulf baange van wuir.
Aan raaize noar ons prachtege overbevolkte Randstad, doar woar onze ekonomie hoogtiij viert en woar de wereld begunt kwam ik tot inkeer.
Harmonie is het toverwoord. Aindrachteghaid mit de randstedeling. Dik, dun, swaad, wit, islamiet of christen, de lotsverbondenhaid was groot op dizze deurdeweekse dag in ons geweldeg tolerant en gezellig kneutereg kikkerlaand .
Tröts as n paauwe was ik deur zoveul solidariteit. De neuzen stonden allemoal dezulfde kaande op. De verbondenhaid was groot. De blik massoal noar t westen en ik was der bie.
Ik stond in n file van 9 kilometer veur Rötterdam….

Noordmannen/VisseringsVisie/Oudeschip

De veurkaande, doar gait het om. Kiek mor ais noar Duutse boerderijen.
De oetstroalen veur t hoes is aine van nije riekdom, gruine trekkers en auto’s mit steerns op de motorkabbe terwiel achterthoes de strontbulde, n stoapel old iezer en aander troepiederij in t oog springen.
Ik vergeet nooit meer de tied dou ik as Top-40 artiest mit n bandje het laand deurtrok om minsen te vermoaken mit: Padadada van the Simple Minds en Hestoe mien zwien ook zain van de Dutchboys.
In het aaltied zunnege Barger Oosterveld leken de wichies aan de achterkaande allemoal op mekoar, t konden twijlingzuskes te wezen. N Jenteg topje mit n strakke blaauwe spiekerboxem en n grode bos geblondeerde krullen. Veural dij krullen en dat geblaikte hoar vuil ons as muzikanten en ervoaringsdeskundegen slim op. T Bleek achternoa dat Tina Turner en Kim Wilde de regionoale kappersschoul zo beinvloud hebben dat de oafgestudaaierde kapsters in Zuud Ooost Drinthe n nije look veur t pladdelaandsdiscotheek bezuiksters ontwikkeld haren.
Mooi of maal, dik of dun ze leken aaltenduvel op mekoar en wie haren veul te kieken. De veurkaande doar gait het om. De eerste indruk dij wie van mekoar hebben is over t algemain beslissend veur de manaar woarop wie mit mekoar omgoan. As dien uterlek aans is of vaalst boeten de boot wost harteloos oafstraft en discriminaart. Wie perbaarn dat deur allerlei wetgeving te veurkommen en tegen te hôllen mor in de daren wereld waarkt dizze wet van de oapies kei en kei haard. k Zag veurege weke n poar Shire peerden,t grootste ras dij n Shetlaand pony van n meter hoog n pak sloage gaven. Gewoon omdat e der anders oetzag kreeg e van drij man sloage.Net minsen. De veurkaande is de schierste kaande. Het front is belangrieker den de kont. Wie beoordailen mins en ding op de veurgevel. Zo liekt de nije Bentley op Keunegin Elizabeth, De Mercedes van mien overbuurman op Karl Heinz Rummenigge, t ainpittertje van Rouppé oet Veelerveen dut mie denken aan t bulldoggie van mien nichie, en de nijste Kia oet Korea het sikkom t aigenste proememondje as mien Tante Klara oet Exloërveen. De Volvo van mien kammeroad het t zulfde bekkie as n muskusrödde van n joar of drije old, de rimpels van de Fiat Multipla doun mie denken aan n operoatie dij misoatjet is en de olderwetse mini cooper het n proelbekkie. t Is net of e constant aan de libbe trekt.
Dr.Hook and the Medicine Show wollen in 1974 mit ale geweld op de veurkaande van de Rolling Stone, op de cover van t Dagblad van t Noorden stait n foto van n chinees dij noar Troapel lopt.
Wie hebben niks aan slechte veurkaanten. Ze mouten schier, eerlieks en zuver op de groad wezen en nait fout. k Kom hom te voak tegen op de veurkaande. Geert Wilders.
Dat is dij man nait weerd.De achterkaande van t geliek is de discussie dij wie aangoan mit mekoar en dat is goud. De gedachtengang van dizze man is levensgevoarlek en heurt nait op veurkaande, nait op de strontbulde, nait in de gruine of grieze container.
De gedachtengang van dizze malloot mout op de veurkaande van‘Mein Kampf’.
n Bestseller net as de biebel en de koran….
O ja, nog wat, Rita Verdonk. Is nationoal socialisme hetzulfde as nationoal liberalisme?