Noordmannen/VisseringsVisie/Haren

Ik heurde vandeweke op Noord n boerinne over eerdappels in Frankriek woar omega 3 in kweekt wodt. Omega 3 is dat spul wat in vedde vis zit en hartstikke gezond is veur hart en bloudvoaten.
T Zit o.a. in makreel en zalm. t Is zulfs zo gek dat t ook aal in botter en eulie zit.
De voedelindustrie bedenkt fiebeldekwinten om ons consumenten op n zogenoamde gezonde manaar te loaten eetn.
Heurst en leest doagelieks over onderzuiken en testen om eterij minder vet en mit allerlei flaauwekul der deur te moaken. Grode dure campagnes mouten t bie ons onder d aandacht brengen.
Wie wodden verneukt mit nijmoodse woorden as light en halva en wie vreetn ons de schompes in slankprodukten en vezels. De smeerkeze oet zo’n kupie is net n soort smoakeloze siliconenkit mit muurvaarve der deur veur de kleur en wat prutjederij veur de smoak. brrrruggh!
In dizze tied van zinloze consumptieve bevrediging heb ik aal voaker last van wins, heimwee noar mien eerste puutje petat met mayonaise.
n Goddeleke pude mit punde deraan dij barstens vol petatten van sikkom 10 centimeter laank zit mit n nog goddeleker klodder olderwetse menaisie over de haile bovenkaande van t zeker haalve kilo wegende puutje.
Gain halvanaise of olijfonaise, nee, dikke lobbege donkeregele mayo mit zo’n puntje van t spoiten in t midden….lekker hoor!
t Eerste blokkie mars, wat n traktoatie was dat! Middelbroene sukkeloa mit n engelachtege waike smoak van toffee zaachte mouse, dij aan de bovenkaande van mien gehemelte bleef plakken is n jeugdervoaring woar ik nou s nachts nog wel ais wakker van wodt. t Gaf mie echt energie!
Fuck de lightprodukten, dood aan de halvajam!
Ain van mien eerste kennismoakingen mit de geneugden des levens was exota.
Wie wazzen snötneusen en mozzen noar de kerke. Achterin kaarfden wie onze noamen in de baanken, zongen: O god van Hema, CenA, en muiken wie ons schuldeg aan goddeloos gedrag mit ain reden. Ain grode reden!
Wie kregen as de kerke oetging Spoetnik. Let op, nog ain keer : Twai scheppen suker en n beste scheut echte vedde koffiemelk in n groot glas en doar exota op, dat was t. Er gruide in het glas n wonder. Mit n theelepeltje aatn wie de spoetnik oet t glas en t zuide wat in t glas achterbleef was de slagroom op de koffie. De nije vullingen sprongen hin en weer van genot.
De eerste culinaire ervoaring van n jonkie mit snöt op de libbe en nog volledeg nat achter d oren.
De automatieken wazzen de oetvinden van de aiw en veural het kipfiletje mit pindasaus van Dolf en Lammie op Muzzelknoal wil ik nou veurdroagen veur n vedleren medallie.
Ach, Dolf en Lammie ze muiken de aaierbalen zulf en haren nog n echte vreet mure.
Noa de repetitie van ons bandje op zundagmiddag zee de pianist aaltied:
“Deze rij is voor mij” en vrat zo van boven noar beneden de haile riege op.
Mag groag over eetn proaten

Noordmannen/VisseringsVisie/Garsthuizen

Wie binnen al sunt joar en dag camperoars. Minsen dij nait in n zummerhoesie, drijstreernhotel of tinde hun vekanzie deurbrengen mor in n appartementje op wielen over de wegen rieden om te genieten van s lands eer, s lands minsen en s lands cultuur.
In 1979 haren wie ons eerste ervoaren mit n old volkswoagenbussie en sunt dij tied het t virus om in n gemotoriseerd verblief te raaizen ons te pakken.
Tuzzentied binnen wie in slechtere periodes ook nog n poar moal mit n tinde op pad west en ook doar was niks mis mit.
Mor as je wat krakkemikkeg in de schammelakken wodden is n wat hogere instap in berre nait verkeerd.
Of om t aanders te zeggen , comfort is t toverwoord, dat gekroep willen wie nait meer.
Och man….,wie hebben wat beleefd deur de joaren hin.
Kepodde koppakkens op de autoboahne, remmen dij vastzaten of t hailemoal nait meer deden in de baargen, klapbaanden op bruggen, vastgelopen motoren en aaltied mor sleudeln, sleudeln en nog ais sleudeln.
Sleudeltje 13 en 17 stoan in mien haanden grift en ik kin mit ogen dicht in 3’41 de radiateur van n olle 207 der onder vot draaien.
In 1991 ree k mit mien kammeroad veur de eerste keer over Rugen in de veurmoalege DDR.
Wie waren verdwoalt en kwamen op n voelstort van radioactief afval terechte, k heb t gevuil dat wie oaf en tou nog licht geven.
In Polen bruukten wie de 207 as jeep en stonden wie mennegmoal mit de vouten in t wotter en tot de deuren in t zaand.
Mien olle Louis de Funest bus mit schoefdeuren is veur de dood weggoan en de 207 diesel is veureg joar verkocht. Van 1978 was e, belastingvrij en ik hoop dat t gezin dij m kocht het der nog hinne plezaar van mag hebben.
Wie hebben n aandere kocht. Halfintegraal zoas dat zo mooi hait, n karrevan mit n stuur der in zok mor zeggen. Mit n vaste berre en n echte turbo diesel onder de kabbe.
K Schoam mie der hoast veur da k het zeggen mout mor k heur nou bie de snakkers, bie de snobs zo k mor zeggen.
Oafgelopen moanden binnen wie wel hier en doar west, mag k gerust wel zeggen. Onderweg kwamen we honderden campers tegen. De aine nog dikker den d aander.
En mor groetn noar mekoar. Zwaaien as idioten, as randdebielen. Ze zaten omgekeerd op stoule om ons noa te zwaaien. Campercultuur a la 2007. De nije rieken en de nije ollen hebben eindelek heur camper gaon ze noar mekoar wuiven.
Wat is doar nou mis mit heur ik joe zeggen? Beleefdhaid is toch n deugd? Niks mis mit,toch?
Niks, hailemoal niks. Mor waiten joe wat het geval is?
As je aargens stoppen en oet joen camper stappen doun ze gain bek open. Ze doun net of ze joe nait zain, kieken die mit de kont nog nait aan.
Of t nou op n camperplek of n camping is, n proatje moaken? …. Ho mor.
Joa, de luu dij wel oardeg binnen en aaltied eem kommen buurten binnen de aigenoars van olle bussies en zulfgemoakte campers. Jonges en wichter dij aal joaren bie t pad binnen.
De echte raaizegers, mit de eerdappels in t veuronder en de dopsleudelset en de vishengel in de schoonmoetje op dak en n deusie moaden stiekum in de koelkaaste.
Dat koale kak gedou mout mor ais oaflopen wezen.
Camperoars opgelet… Dij mit die dikke middelvinger, dat bin ik….

Noordmannen/VisseringsVisie/Muntendam

In gedachten verzopen rie ik over de autoboane mit n gemiddelde snelhaid van goud 100 kilometer.
t Weer is goud, nait te kold, nait te waarm, schier genog om n beste partij kilometers te vreetn. Joarenlaank heb k hier noartou leeft. De grode raise.
De nadde jongesdreum. Mit de camper noar Skandinoavïe over Finlaand, deur Ruslaand , Estlaand, Letlaand, Litauen en zo via Polen en Duutslaand weer op hoes aan. Mien haile repertoire aan nachteleke fantasien heb ik hier in de loop van de joaren op lösloaten. Deur t lezen van : De Laatste Tsaar verbeelde ik mie sums betrapt te wodden in de Barnstainenkoamer, op de barnstainentoafel mit n mooi witteg middelaiws prinsessie dij mie de kop roeg muik mit heur zes onderboxems, drij onderjurken en de rest van de garderobe woar dij grode klaaierwinkel in Onstwedde jeloers op zol wezen.
Prachtege verhoalen van as n Tsaar nait meer voldee wuir e vermoord deur zien lijfeigenen, mor as hai ze deur haar wast aansom, den sluigen de Tsoaren mit de noamen Alexander en Nicoloas genoadeloos tou.
Sint Petersburg stad oet mien dreumen ik kom der aan!
Eerst eem bie Rütenbrouck de 31 op richting Leer, Oldenburg den wat gedonder mit de wegen bie Delmenhorst, dij verrekte stoplichten doar waiten je ja wel…, den Hamburg, Denemarken.
In gedachten bin k weer in 1977 in Denemarken. Ik was jong, haar stiekom tovertebak bie mie, kon Donna,Donna, Donna oet de kop op mien gitaar speulen en k traktaarde de haile jeugdoafdailen van Birkhede Camping op jenever oet Holland.
Naargens is de noam van Hoogholt zo prezen as dij oavend aan t meer in Denemarken. Mor de raise gait wieder. k Dreum der nog n etappe aan vast en kom deur Noorwegen en Zweden. Bin hailemoal van mien stuk as ik in Stockholm Agneta van ABBA zai lopen. Mor ja, in n dreume kin ales.
Der lopt aal n kiddel achter heur aan. Paparazi zeker.
Zo rie ik wieder over n smaalachteg weggie in n vlak landschop mit veul bossen.
k Lach in miezulf as ik alweer mit de kop der nait bie deur Finlaand rie en versteld stoa van de veule baarkebomen.
Widde bomen,bomen, mit n zulvern hoed en op summege ploatsen hangen ze stief vol hexebezzems.
Ik heb n gitaar van baarkenholt. n Blonde gitaar nuimen wie insiders dat.
n Blonde gitaar oet Finlaand…. Bin ik aal in Finland???
Hè, wat is dat nou? Jipsingbourtange? U rijdt te hard?
Shit! Flits! Ah, nee hè…..!